Turizm İnstitutu beynəlxalq əlaqələr meridianlarında

“Dövlət Strategiyasının tələblərinə uyğun olaraq ATİ beynəlxalq təhsil məkanına inteqrasiya edir”

Ölkə Prezidentinin sərəncamı ilə təsdiq edilən “Azərbaycan Respublikasında təhsilin inkişafı üzrə Dövlət Strategiyası” keyfiyyət nəticələri və əhatəliliyinə görə dünya ölkələri sırasında aparıcı mövqe tutan, səriştəli müəllim, təhsil menecerlərinə, qabaqcıl texnologiyalara əsaslanan infrastruktura malik təhsil sisteminin yaradılmasını nəzərdə tutur.

Azərbaycan Turizm İnstitutunun beynəlxalq əlaqələr şöbəsinin müdiri Şəhla Əhmədovanın sözlərinə görə, bu strateji istiqamətlərin reallaşdırılması qabaqcıl beynəlxalq təcrübənin öyrənilməsinə və milli-mənəvi dəyərlərə uyğunlaşdırılaraq uğurlu tətbiqinə zəmin yaradır. Şöbə müdiri deyir ki, ölkənin ən gənc ali məktəblərindən olan ATİ yarandığı gündən beynəlxalq əməkdaşlığa xüsusi önəm verir: «Dövlət Strategiyasının qarşıya qoyduğu tələblərə müvafiq olaraq institutumuz beynəlxalq təhsil məkanına inteqrasiyanı başlıca vəzifələrdən biri kimi görür. ATİ ilə Avstriyanın İMC Krems Tətbiqi Elmlər Universiteti arasında bakalavr təhsil pilləsi üzrə imzalanmış müqaviləyə əsasən ötən tədris ilində 15 nəfər hər iki təhsil müəssisəsinin diplomunu əldə edib. 2013-2014-cü tədris ilində bakalavr pilləsi üzrə 31, magistratura pilləsi üzrə 18 nəfər bu proqramda oxumaq şansı qazanıb. Akademik müqavilənin şərtlərinə əsasən tələbələr üç tədris ili ərzində «Turizm və asudə vaxt menecmenti proqramı» üzrə ingilis dilində təhsil alırlar. İndiyədək ATİ-nin 72 məzunu bakalavr pilləsi üzrə Azərbaycan-Avstriya Turizm Proqramını uğurla başa vurub. Hazırda məzunlarımız «Hilton Baku», «Four Seasons», «Jumeirah Bilgah Beach», «Marriotte Absheron», «Fairmont», «Kempinski Badamdar», eləcə də «Şahdağ» Qış-Yay Turizm Kompleksinin hotellərində çalışırlar».

ATİ-nin məzunlarından bəziləri xarici ölkələrdə işləyir və ya təhsilini davam etdirirlər: «Maldiv adaları, Birləşmiş Ərəb Əmirliyi kimi turizmi prioritet seçən ölkələrdə işləyənlər, Türkiyə, Almaniya, İsveçrə, Britaniyada təhsillərini davam etdirənlər var. Avropa İttifaqının Erasmus-Mundus proqramı çərçivəsində 3 magistrant tələbə Portuqaliyanın Vyana du Kaştelo Politexnik Universitetində təhsil müddətini artıq başa vurub. Ötən il Almaniyada təşkil olunan intensiv yay dil kursunda 14 nəfər iştirak edib”.

Həmsöhbətim deyir ki, qloballaşma prosesi müxtəlif dövlətlərin təhsil sistemində inteqrasiyanı labüd edir. ATİ-nin beynəlxalq təşkilatlara üzvlüyündən danışan Şəhla Əhmədovanın sözlərinə görə, bu, instituta dividentlər gətirir: «2011-ci ildən Azərbaycan Turizm İnstitutu Dünya Turizm Təşkilatının «qoşulmuş üzvü» kimi müxtəlif konfrans, sərgi və toplantılarda iştirak edir. İnstitutumuz ötən il DTT-nin Manamada (Bəhreyn) keçirdiyi «Turizmdə yeni mədəni üfüqlərin kəşfi» adlı beynəlxalq konfransda, təşkilatın “İpək Yolu” İşçi Qrupunun 3-cü iclasında (Bakı) rəhbərlik səviyyəsində təmsil olunub. Onu da qeyd edək ki, tələbələrimiz Bakıda keçirilən ənənəvi AİTF beynəlxalq sərgisində DTT-nin stendini qurumun nümayəndələri ilə yanaşı təmsil edirlər. ATİ-nin rektoru Cəfər Cəfərov ötən ilin avqustunda DTT Baş Assambleyasının Zimbabvedə keçirilən 20-ci sessiyasında Azərbaycan nümayəndə heyətinin tərkibində iştirak edib. Səfər zamanı Cənubi Afrika Respublikasında turizm profilli ali təhsil müəssisələri ilə ilkin əməkdaşlıq istiqamətləri müəyyənləşdirilib”.

Şöbə müdiri qeyd etdi ki, ATİ beynəlxalq şəbəkə və təşkilatlar tərəfindən təhsilin, mədəniyyətlərarası dialoqun inkişaf etdirilməsi, ali təhsil müəssisələri arasında faydalı əlaqələrin qurulması, ölkənin turizm potensialının hərtərəfli öyrənilməsinə dair konfrans və toplantıların iştirakçısı olub. İnstitut 2010-cu ildə əsası qoyulmuş Avrasiya İpək Yolu Universitetləri Konsorsiumunun iştirakçısıdır. ATİ bundan sonra da beynəlxalq əlaqələrini genişləndirmək niyyətindədir.

Fəxriyyə Abdullayeva

Mədəniyyət.- 2014.- 5 mart.- S. 9.