Şirvan şəhərinə həsr olunmuş kitabın müzakirəsi

Martın 3-də Şirvan Şəhər Mərkəzi kitabxanasının uşaq şöbəsində diyarşünaslıq biliklərinin artırılması məqsədilə şair-publisist Eldar Qəmərlinin “Şirvan şəhəri” kitabının müzakirəsi keçirilib.

Tədbiri jurnalist Yaqut Hüseynova açaraq Eldar Qəmərlinin həyat və yaradıcılığı haqqında məlumat verib. Şəhər Tarix-Diyarşünaslıq Muzeyinin direktoru Gülşən Vəliyeva, 4 saylı tam orta məktəbin müəllimi Əbil Əhmədov, Mədəniyyət evinin əməkdaşı, şair, publisist Nurlan Qədimov, Mərkəzi kitabxananın əməkdaşları Alma Cəfərova, Vəzufə Xudiyeva, Kəmalə İsayeva, Mehriban Novruzova, 9 saylı tam orta məktəbin tarix müəllimi Fərqanə Babanlı və digər çıxış edənlər kitabın Şirvan şəhərinin tarixi haqqında dəyərli mənbə olduğunu, müəllifin əsəri yazarkən müxtəlif araşdırmalar apardığını bildiriblər.

Şirvan şəhər MKS-nin direktoru İltifat Nəbiyev Eldar Qəmərli ilə tanışlığının gənc yaşlarına təsadüf etdiyini, onu səmimi, safürəkli insan kimi tanıdığını, əsərlərini hər zaman sevə-sevə oxuduğunu vurğulayıb.

Sonda tədbir iştirakçılarına Eldar Qəmərlinin “Evləri köndələn yar”, “Ağacdələn”, “Şirvan şəhəri” kitabları hədiyyə olunub.

Mədəniyyət.- 2014.- 12 mart.- S. 13.