Ali rəssamlıq məktəbləri arasında əməkdaşlıq memorandumu

Azərbaycan Rəssamlıq Akademiyası ilə Kəmaləddin Behzod adına Özbəkistan Rəssamlıq və Dizayn İnstitutu arasında əməkdaşlıq memorandumu imzalanıb. Mərasim ölkəmizin Özbəkistandakı səfirliyi və səfirliyin nəzdində fəaliyyət göstərən Heydər Əliyev adına Azərbaycan Mədəniyyət Mərkəzinin təşəbbüsü və təşkilatçılığı ilə gerçəkləşib. Sənədi Azərbaycan Rəssamlıq Akademiyasının prorektoru, Xalq rəssamı Salxab Məmmədov və Özbəkistan Rəssamlıq və Dizayn İnstitutunun rektoru, tanınmış rəssam Xasan Aminov imzalayıblar.

Memorandumda ikitərəfli əməkdaşlığın inkişaf etdirilməsi, müəssisələr arasında təcrübə mübadiləsinin aparılması, birgə sərgilərin, festivalların keçirilməsi, rəssamlıq sənətinin inkişaf etmiş janrlarının mübadiləsi, qarşılıqlı səfərlərin, müxtəlif tədbirlərin təşkili və s. məsələlər öz əksini tapıb.

Tədbir çərçivəsində Özbəkistan Rəssamlıq Akademiyasında Azərbaycanın tanınmış rəssamlarının təltif olunma mərasimi də keçirilib. Xalq rəssamı Salxab Məmmədov, Azərbaycan Milli İncəsənət Muzeyinin direktoru, professor Çingiz Fərzəliyev, Rəssamlıq Akademiyasının prorektoru, Xalq rəssamı Fuad Salayev Kəmaləddin Behzod adına Özbəkistan Rəssamlıq və Dizayn İnstitutunun fəxri professorları təltif olunub.

Mədəniyyət.- 2014.- 7 may.- S. 6.