Türk dünyası naşirləri və yazıçıları Əskişəhərdə bir araya gəliblər

 

Türkiyədə Avrasiya türk dünyası kitab sərgisi keçirilir. 2013-cü ildə “Türk dünyasının mədəniyyət paytaxtı” olan Əskişəhərdə keçirilən sərgi Avrasiya Yazarlar Birliyi və “Azərbaycan Naşirlər və Poliqrafçılar” İctimai Birliyi tərəfindən təşkil olunub.

Mayın 5-də gerçəkləşən açılışda Əskişəhər valisi Güngör Azim Tuna, Türkiyənin təhsil naziri Nəbi Avcı, Azərbaycanın Xalq yazıçısı Anar, Avrasiya Yazarlar Birliyinin sədri Yaqub Öməroğlu, “Azərbaycan Naşirlər və Poliqrafçılar” Birliyinin sədri Bəhruz Axundov, Milli Məclisin deputatı, yazıçı-publisist Aqil Abbas, Yazıçılar Birliyinin katibi Rəşad Məcid, digər tanınmış müəlliflər iştirak ediblər.

Çıxışlarda sərginin qardaş xalqlar arasında mədəni əlaqələrin möhkəmlənməsində rolundan söz açılıb. Yüzə yaxın stendin qurulduğu sərgi mayın 10-dək davam edəcək. Burada türkdilli xalq və toplumların nəşriyyatlarının çap məhsulları, müxtəlif dərgilər, türk sənət nümunələri, elmi-publisistik məzmunlu kitablar nümayiş etdirilir. Həmçinin tanınmış yazıçıların imza günləri keçirilir, yeni kitablar təqdim olunur. Azərbaycan kitab bayramında beş nəşriyyatla təmsil olunur.

 

Mədəniyyət.- 2014.- 9 may.- S. 3.