“Festival qədim atçılıq ənənələrinin bərpasına xidmət edir”

“Şəkidəki Respublika Atçılıq Turizm Mərkəzində ənənəvi olaraq Azərbaycan xalqının ümummilli lideri Heydər Əliyevin xatirəsinə həsr olunmuş milli atüstü oyunlar festivalı və Prezident Kuboku uğrunda çövkən milli oyunu üzrə yarışlar keçirilir. Sevindirici haldır ki, bu tədbirlərin coğrafiyası ildən-ilə genişlənir, daha kütləvi xarakter alır. Bu tədbirlər xalqımızın mədəni irsi olan milli atüstü oyunların qorunub saxlanması, qədim atçılıq ənənələrinin bərpası, atçılıq turizminin inkişaf etdirilməsi məqsədi daşıyır. Oyunların keçirildiyi Atçılıq Turizm Mərkəzi ölkəmizdə atçılıq turizminin inkişafına göstərilən qayğının bariz nümunəsidir”.

Bu sözləri Mədəniyyət və Turizm Nazirliyinin Aparat rəhbərinin müavini, festivalın keçirilməsi üzrə təşkilat komitəsinin üzvü Cavanşir Cəfərov AzərTAc-a müsahibəsində deyib.

O diqqətə çatdırıb ki, ötən ilin dekabrında UNESCO-nun Qeyri-Maddi Mədəni İrsin Qorunması üzrə Hökumətlərarası Komitəsinin Bakıda keçirilən 8-ci sessiyasında Qarabağ atları üzərində çövkən oyunu təşkilatın “Təcili qorunmaya ehtiyacı olan qeyri-maddi mədəni irs siyahısı”na salınıb: “Bəşəriyyətin qorunmaya ehtiyacı olan mədəni ənənələri siyahısına Azərbaycanın milli atüstü oyununun daxil edilməsi ölkəmiz üçün çox önəmlidir”.

Nazirliyin təmsilçisi bildirib ki, festivalın xalqımızın ümummilli lideri Heydər Əliyevin xatirəsinə həsr olunması təsadüfi deyil: “Ulu öndər bütün fəaliyyəti dövründə Azərbaycan mədəniyyətinin inkişafına, milli-mənəvi dəyərlərimizin qorunmasına böyük diqqət və qayğı göstərib. Bu ənənə indi də davam etdirilir. Mədəniyyətimizin, incəsənətimizin inkişafında, əcdadlarımızın bizə miras qoyduğu mədəni dəyərlərimizin qorunması və təbliğində dövlətimizin başçısı İlham Əliyevin, həmçinin Heydər Əliyev Fondunun prezidenti, UNESCO və İSESCO-nun xoşməramlı səfiri Mehriban xanım Əliyevanın xidmətləri danılmazdır”.

Mədəniyyət.- 2014.- 9 may.- S. 8.