Məşhur dirijor Niyazinin mənzil-muzeyini ziyarət edib

Bakıda keçirilən VII Beynəlxalq Mstislav Rostropoviç Festivalında məşhur musiqi xadimləri iştirak edir. Festivalın qonaqları arasında dünya şöhrətli dirijor, SSRİ Xalq artisti, SSRİ dövlət mükafatları laureatı Yuri Temirkanov da var.

Mayın 13-də görkəmli musiqiçi Azərbaycanın Xalq artisti, dirijor Yalçın Adıgözəlovla birlikdə maestro Niyazinin mənzil-muzeyini ziyarət edib. Qonağa muzeyin tarixi, böyük bəstəkar, dirijor, ictimai xadim, SSRİ Xalq artisti Niyazinin yaradıcılığı, maestronun burada qorunub saxlanılan şəxsi əşyaları, fotoşəkilləri, ekspozisiyalar haqqında məlumat verilib. Bildirilib ki, Azərbaycan musiqi mədəniyyətinin inkişafında xüsusi xidmətləri olan Niyazi 1958-ci ildən ömrünün sonuna - 1984-cü ilədək bu mənzildə yaşayıb. 1994-cü ildə ümummilli lider Heydər Əliyevin iştirakı ilə mənzil-muzeyin açılışı olub.

Hazırda muzeydə görkəmli dirijora aid 6 mindən çox material - not əlyazmaları, disklər, afişalar, çoxlu fotoşəkillər qorunub saxlanılır. Qonağa məlumat verilib ki, Niyazinin hobbisi fotoşəkil çəkmək olub. Sənətkarın arxivində 2600-dək foto nümunəsi var.

Muzeylə tanışlıqdan sonra əməkdaşlarla xoş təəssüratlarını bölüşən Yuri Temirkanov “Qonaqlar kitabı”na ürək sözlərini yazıb.

Qeyd edək ki, Yuri Xatuyeviç Temirkanov 1938-ci ildə Rusiya Federasiyası Kabardin-Balkar Respublikasının Nalçik şəhərində anadan olub. Sankt-Peterburq Dövlət Konservatoriyasında təhsil alıb. 1966-1972-ci illərdə indiki Sankt-Peterburq (Leninqrad) Kiçik Opera və Balet Teatrında dirijor işləyib. Daha sonra Sankt-Peterburq Akademik Filarmoniyasının Simfonik Orkestrinə rəhbərlik edib, şəhərdəki Akademik Opera və Balet Teatrında (indiki Mariinski teatrı) baş dirijor və bədii rəhbər, Böyük Teatrda dəvətli baş dirijor kimi çalışıb. Həmçinin London Kral Filarmonik Orkestrində, Drezden Filarmonik Orkestri və Danimarka Milli Simfonik Orkestrində dəvətli baş dirijor işləyib.

Savalan Fərəcov

Mədəniyyət.- 2014.- 16 may.- S. 6.