Qocaman yazıçı-jurnalistin yubileyi qeyd olunub

Sentyabrın 26-da Azərbaycan Mətbuat Şurasında tanınmış yazıçı-jurnalist Əfqan Əsgərovun 85 illik yubileyi ilə bağlı mərasim keçirilib.

Şuranın Ahıl Jurnalistlər Məclisinin təşəbbüsü ilə gerçəkləşən toplantıda veteran jurnalistin həyat və fəaliyyətinin müxtəlif məqamlarından, yaradıcılığından söz açılıb.

Mərasimdə çıxış edən MŞ-nin sədri Əflatun Amaşov bildirib ki, uzun illər “Azərbaycan gəncləri”, daha sonra “Kommunist” qəzetində çalışan Əfqan Əsgərov jurnalistlik fəaliyyəti ilə yanaşı, Azərbaycan ədəbiyyatının inkişafına da töhfələr verib, nəsr və dramaturgiya sahəsində əsərlər yazıb. O, Moskvada ali ssenarist kursunu bitirdikdən sonra “Azərbaycanfilm” kinostudiyasında redaktor işləyib. Daha sonra Ə.Amaşov yubilyara MŞ-nin təbrik plaketini və hədiyyəsini təqdim edib. Yubilyara vaxtilə çalışdığı “Xalq qəzeti”nin (o zamankı “Kommunist”) də hədiyyəsi təqdim olunub.

MŞ-nin Ahıl Jurnalistlər Məclisinin rəhbəri Yusif Kərimov ömrünü-gününü jurnalistika peşəsinə həsr etmiş qələm sahiblərinin yada salınmasının mühüm əhəmiyyət daşıdığını bildirib.

Mərasimdə çıxış edən veteran jurnalistlərdən Əli İldırımoğlu, Şakir Yaqubov, Müştəba Əliyev, Rafiq Həsənov, Rafiq Hacıyev, həmçinin “Xalq qəzeti”nin baş redaktor müavini Tahir Aydınoğlu və başqaları Ə.Əsgərovu ustad jurnalist, gözəl nəsr əsərlərinin yaradıcısı, səmimi dost kimi xarakterizə ediblər.

Sonda çıxış edən yubilyar toplantı iştirakçılarına təşəkkürünü bildirib.

Qeyd edək ki, Əfqan Hacıağa oğlu Əsgərov 1929-cu il sentyabrın 23-də anadan olub. “Gecikmisən”, “Gözəllik sorağında”, “Sən belə deyilsən”, “Sarı əlcək” və başqa hekayə topluları nəşr edilib. “Gülyanaq”, “Katib”, “Həsrət də bir vüsaldır”, “Qartal əfsanəsi” romanları, “Dədə Bəhmən” trilogiyası, “Qozbel”, “Məhəbbət ətirli qərənfilim”, “Dünya gözəlliyindir”, “O, daş deyildir” və başqa povestləri ədəbi nəsrimizin inkişafında mühüm yer tutan əsərlərdəndir.

Mədəniyyət.- 2014.- 1 oktyabr.- S. 15.