Tarixçi alim beynəlxalq konqresdə çıxış edib

AMEA-nın Milli Azərbaycan Tarixi Muzeyinin əməkdaşı, tarix üzrə fəlsəfə doktoru Pərvin Gözəlov Moskvada Silah Kolleksiyaları və Hərbi Tarix Beynəlxalq Muzeylər Komitəsinin (International Committee for Museums of Arms and Military History - ICOMAM) konqresində məruzə ilə çıxış edib.

Komitənin Rusiya Silahlı Qüvvələrinin Mərkəzi Muzeyində keçirilən builki konqresi “Hərbi-tarix muzeyləri müasir tarix kontekstində. Aktuallıq və tələbat” mövzusuna həsr olunub.

Pərvin Gözəlov tədbirdə “XIX əsrdə Rusiya imperiyası ordusunun tərkibində Azərbaycan atlı-müsəlman alayları” mövzusunda məruzə ilə çıxış edib. Məruzədən sonra Milli Azərbaycan Tarixi Muzeyində qorunan Azərbaycan atlı-müsəlman alaylarının bayraqlarını əks etdirən slayd-film də nümayiş olunub.

Konqresə Azərbaycanla yanaşı, Rusiya, ABŞ, Avstriya, Almaniya, Braziliya, Belçika, Böyük Britaniya, Danimarka və digər ölkələrdən 60-dan çox muzey mütəxəssisi qatılıb.

Mədəniyyət.- 2014.- 17 oktyabr.- S. 11.