“Qafqaz dağları, mən sizə yad deyiləm”

Böyük rus şairi M.Y.Lermontovun 200 illiyi münasibətilə almanax hazırlanıb

Oktyabrın 22-də Azərbaycan Yazıçılar Birliyinin “Natəvan” zalında böyük rus şairi Mixail Yuryeviç Lermontovun 200 illiyinə həsr olunmuş “Qafqaz dağları, mən sizə yad deyiləm” adlı poeziya və nəsr almanaxının təqdimat mərasimi keçirilib. Nəfis tərtibatlı almanax “Sodrujestvo” Azərbaycan xalqlarının həmrəyliyi cəmiyyətinin və Rusiyanın Azərbaycandakı səfirliyinin dəstəyi ilə “Mütərcim” nəşriyyatında çapdan çıxıb.

Tədbirdə “Sodrujestvo” cəmiyyətinin sədri Tatyana Kərimova, kitabın tərtibçilərindən tanınmış şair Alina Talıbova, şair və yazıçı Marat Şəfiyev, “Azərnəşr”in direktoru Azər Mustafazadə, Rusiyanın Azərbaycandakı səfirliyinin müşaviri Aleksandr Qladkov, şair-tərcüməçi, Əməkdar incəsənət xadimi Çingiz Əlioğlu, “Literaturnı Azerbaydjan” jurnalının baş redaktoru Solmaz İbrahimova, şair-tərcüməçi Siyavuş Məmmədzadə və digər çıxış edənlər şairin həyat və yaradıcılığından söz açıblar. Qeyd edilib ki, M.Y.Lermontov qısa ömrünün bir hissəsini Qafqazda keçirmiş, o cümlədən Azərbaycanda olmuş, Azərbaycan dilini öyrənməyə çalışmış, xalqımızın folkloru ilə maraqlanmış, öz əsərlərində bu yerlərə məhəbbətini ifadə etmişdir. Almanaxa M.Y.Lermontov haqqında Azərbaycan və Rusiya müəlliflərinin şeirləri və məqalələri, onun əsərlərinə çəkilmiş illüstrasiyaların və Lermontov mövzusuna həsr olunmuş rəsmlərin reproduksiyaları da daxil edilib.

Mərasimdə Lermontovun əsərlərindən parçalar, şeirlərinə yazılmış romanslar, Azərbaycan şairlərinin ona həsr etdikləri əsərlər səsləndirilib.

Mədəniyyət.- 2014.- 24 oktyabr.- S. 8.