Dədə Qorqud irsi və türk xalqlarının mədəniyyəti

Ölkəmiz Qazaxıstanda festival və konfransda təmsil olunub

Oktyabrın 8-də Qazaxıstanın Qızılorda şəhərində TÜRKSOY-un təşkilatçılığı ilə “Dədə Qorqud irsi və türk xalqlarının zəngin mənəvi mədəniyyəti” adlı beynəlxalq elmi-praktiki konfrans keçirilib. Azərbaycan Musiqi Mədəniyyəti Dövlət Muzeyinin direktoru, sənətşünaslıq üzrə fəlsəfə doktoru, Əməkdar mədəniyyət işçisi Alla Bayramova konfransda “Türk mədəni irsinin interpretasiya məsələlərinə dair” məruzə ilə çıxış edib.

Konfrans “Dədə Qorqud və Böyük bozqırın musiqisi” adlı beynəlxalq festival çərçivəsində gerçəkləşib. Festivalın konsert proqramında muzeyin Qədim Musiqi Alətləri Ansamblının musiqiçiləri - bədii rəhbər, Əməkdar artist Munis Şərifov, ansamblın solisti, Əməkdar artist Nuriyyə Hüseynova və Davud Abdullayev çıxış ediblər.

Mədəniyyət.- 2014.- 29 oktyabr.- S. 6.