“İncəsənətdə görkəmli şəxs”

Milli İncəsənət Muzeyinin direktoruna Kembric Universitetinin təsis etdiyi mükafat təqdim olunub

Azərbaycan Milli İncəsənət Muzeyinin direktoru, professor Çingiz Fərzəliyev Böyük Britaniyanın Kembric Universitetinin təsis etdiyi, Böyük Britaniyanın Beynəlxalq Bioqrafik Mərkəzinin "2014-cü il - İncəsənətdə görkəmli şəxs" mükafatına layiq görülüb.

Milli İncəsənət Muzeyinin direktoru bu münasibətlə 1-6 sentyabr tarixində Kembricdə keçirilən incəsənət, texnologiya və kommunikasiya üzrə beynəlxalq konqresə dəvət olunub. Sentyabrın 5-də Böyük Britaniyanın Beynəlxalq Bioqrafik Mərkəzinin direktoru doktor Nikolas Lou ilə görüş zamanı mükafat ona təqdim olunub.

Xatırladaq ki, professor Çingiz Fərzəliyev "Azərbaycan rəngkarlığının antologiyası", "Azərbaycan Dövlət İncəsənət Muzeyi", "Azərbaycanın el sənəti", "Natürmort" və digər nəfis nəşrlərin müəllifidir. O, həmçinin Azərbaycan təsviri sənətinin 45 ustad sənətkarına həsr edilmiş 36 kitabdan ibarət nəşrlər silsiləsinin də müəllifidir.

Mədəniyyət.- 2014.- 12 sentyabr.- S. 5.