“Ümumi mədəni irs şəhərləri” seminarı başa çatıb

Mədəniyyət və Turizm Nazirliyinin İslam Əməkdaşlıq Təşkilatının İqtisadi və Ticarət Əməkdaşlığı üzrə Daimi Komitəsinin (COMCEC) maliyyə dəstəyi ilə həyata keçirdiyi «Ümumi mədəni irs şəhərləri» beynəlxalq arxeoloji-turizm layihəsi çərçivəsində təşkil olunan seminar yekunlaşıb.

Sentyabrın 16-da «Qafqaz Point» mehmanxanasında başlanan seminarda Azərbaycan, Qazaxıstan, Türkiyə və Özbəkistanın ortaq tarixi-mədəni irsi, arxeoloji turizm potensialı, yaradılacaq yeni birgə turizm məhsulu və onun turizm sənayesi üçün əhəmiyyəti, əməkdaşlıq perspektivləri müzakirə olunub.

Tədbirin 3-cü günü iştirakçılar Şamaxı və Ağsu rayonlarına səfər edərək bu bölgələrin arxeoloji və turizm potensialı barədə məlumat alıblar. «Ağsu» arxeoloji-turizm kompleksində təşkil olunan yekun iclasda yaradılacaq yeni birgə turizm məhsulu üzrə razılaşma əldə olunub.

Qeyd edək ki, oktyabr ayında yekunlaşacaq layihə COMCEC-ə üzv olan 4 ölkədə (Azərbaycan, Qazaxıstan, Özbəkistan və Türkiyə) mədəni turizm, xüsusilə arxeoloji turizm potensialının araşdırılması və bu ölkələrin turizm məhsulunun yaradılmasını nəzərdə tutur.

Fəxriyyə Abdullayeva

Mədəniyyət.- 2014.- 19 sentyabr.- S. 9.