Özbəkistanda Naftalan haqqında kitab nəşr edilib

Ölkəmizin Özbəkistandakı səfirliyinin nəzdindəki Heydər Əliyev adına Azərbaycan Mədəniyyət Mərkəzinin layihəsi ilə Özbəkistanda Azərbaycanın Naftalan müalicə-istirahət mərkəzi haqqında "Möcüzəvi Naftalan” adlı kitab hazırlanıb. Nəşrin özbək və rus dillərində hazırlanmasında əsas məqsəd Azərbaycanın turizm resurslarının təbliği və Naftalana maraq göstərən, habelə burada müalicə almaq istəyən özbək turistlərinə informasiya dəstəyi göstərməkdir.

Kitabda Naftalan şəhəri haqqında məlumat verilir, öz möcüzəsi və şəfası ilə dünyada məşhur olan Naftalan neftinin tarixi, müalicəvi xarakteristikası, burada müasir standartlara cavab verən şərait, hotel və sanatoriya xidmətləri geniş işıqlandırılır.

Özbəkistanda Naftalan sanatoriyalarına böyük maraq var. Bu layihənin davamı olaraq Heydər Əliyev adına Azərbaycan Mədəniyyət Mərkəzinin təşkilatçılığı ilə yay aylarında özbəklər üçün öz hesablarına Naftalana ongünlük müalicə turu təşkil ediləcək. Layihəyə Azərbaycandan "My Travel" turizm şirkəti də təşkilati dəstək göstərəcək. Bu məqsədlə nəşrin sonunda sifarişçilər üçün bu şəhərdə müalicə turunu təşkil edən əlaqələndirici təşkilatların məlumatları da daxil edilib.

Mədəniyyət.- 2015.- 1 aprel.- S. 6.