Türkiyənin media nümayəndələri Azərbaycanda

Aprelin 2-də Azərbaycan Mətbuat Şurasının dəvəti ilə Türkiyənin tanınmış kütləvi informasiya vasitələrinin təmsilçiləri ölkəmizə səfərə gəliblər. «Sabah», «Posta», «Hürriyyət» qəzetlərinin, “Fox”, NTV, ATV, «Kanal A», «CNN Türk» və digər telekanalların, həmçinin Anadolu Agentliyinin təmsilçilərindən ibarət heyətə Türkiyə Qəzetçilər Federasiyasının rəhbəri Mehmet Ali Dim başçılıq edir.

Səfərin məqsədi Azərbaycan həqiqətlərinin Türkiyə ictimaiyyətinə daha yaxından çatdırılması istiqamətində aparılan fəaliyyətə dəstək göstərmək, o cümlədən I Avropa Oyunları ilə bağlı həyata keçirilməkdə olan işlərin geniş şəkildə işıqlandırılmasını təmin etmək, iki ölkə mediası arasındakı əməkdaşlığı daha da dərinləşdirməkdir. Aprelin 5-dək davam edəcək səfər proqramına Azərbaycan Respublikası Prezidentinin Administrasiyasında, Milli Məclisdə, Heydər Əliyev Mərkəzində, I Avropa Oyunlarının Təşkilat Komitəsində, ADA Universitetində, Mətbuat Şurasında görüşlər, paytaxtdakı idman qurğuları ilə tanışlıq daxildir.

Mədəniyyət.- 2015.- 3 aprel.- S. 4.