Milli Kitabxana beynəlxalq konqresdə təmsil olunub

Azərbaycan Milli Kitabxanasının kitabxanaşünaslıq elmi tədqiqat şöbəsinin müdiri Aygün Hacıyeva Qazaxıstanın paytaxtı Astanada keçirilən Beynəlxalq Oxu Konqresində iştirak edib.

Qazax xanlığının 550 illiyi münasibətilə keçirilən konqresdə müxtəlif ölkələrdən ictimai-siyasi, mədəni, təhsil və elm xadimləri, milli kitabxanaların nümayəndələri qatılıb.

Tədbirdə çıxış edən Qazaxıstanın mədəniyyət və idman naziri Arıtsanbek Muxamediuli kitabxanaçılıq sahəsində qonşu dövlətlərlə əməkdaşlığın bundan sonra da davam etdiriləcəyini, bu sahədə təcrübə mübadilələrinin vacibliyini vurğulayıb. Nazir tədbirdə iştirak edən yazıçıları, həmçinin konqresdə təmsil olunan kitabxanaları medal və diplomlarla mükafatlandırıb.

Beynəlxalq konqresdə Qazaxıstan, Azərbaycan, Qırğızıstan, Rusiya, Çin və Türkiyədə mütaliə mədəniyyəti, kitab mədəniyyətinin vəziyyəti ilə bağlı nəzəri və təcrübi problemlər müzakirə edilərək, regional və beynəlxalq əməkdaşlığın perspektivləri mövzusunda fikir mübadiləsi aparılıb.

Mədəniyyət.- 2015.- 4 dekabr.- S. 5.