“Müasir mədəni menecment: gənclərin rolu”

Sumqayıtda zona seminar-müşavirəsi

Mədəniyyət və Turizm Nazirliyinin təşkilatçılığı ilə Sumqayıt şəhərində “Müasir mədəni menecment: gənclərin rolu” adlı seminar-müşavirə keçirilib. Sumqayıt şəhər, Abşeron, Siyəzən, Qubadlı rayonlarının mədəniyyət müəssisələrində çalışan gənc əməkdaşların qatıldığı tədbir mədəniyyət işçilərinin nəzəri hazırlıq səviyyəsinin artırılması, sistemdə yaradıcı mühitin dəstəklənməsi, mədəniyyət sahəsində effektiv idarəetmənin yüksəldilməsi, müəssisələrarası sıx işgüzar əlaqələrin təmin olunması məqsədilə təşkil edilib.

Nazirliyin Elm, təhsil və gənclərlə iş şöbəsinin məsləhətçisi Cavid Əliyev seminarı açaraq son dövrlərdə həyata keçirilən mədəni tədbirlər barədə məlumat verib. Azərbaycan Turizm və Menecment Universitetinin ictimai fənlər kafedrasının müəllimi Vüsalə Məmmədzadə mədəni menecment sahəsində gənclərin fəaliyyətinin əhəmiyyəti barədə geniş məruzə ilə çıxış edib. Universitetin menecment kafedrasının müəllimi Elməddin Hacıyev kütləvi tədbirlərin təşkili və idarə olunması sahəsində fikir mübadiləsi aparıb və gənclərin rolunu xüsusi vurğulayıb.

Tədbir sual-cavab formatında davam edib. Mədəniyyət müəssisələrinin əməkdaşları maraqlı fikirlərlə çıxış ediblər.

Mədəniyyət.- 2015.- 18 dekabr.- S. 10.