Dünya azərbaycanlıları həmrəyliyi bayram edir

Ukrayna Nazirlər Kabinetinin Qəbullar Evində Dünya Azərbaycanlılarının Həmrəylik Günü münasibətilə bayram tədbiri keçirilib. Azərbaycanın səfirliyi və “Ukrayna Azərbaycanlılarının Birləşmiş Diasporu” Ümumukrayna ictimai təşkilatı tərəfindən təşkil edilən tədbirin bədii hissəsində dünya şöhrətli sənətkar Rəşid Behbudovun bacısı oğlu, müğənni Cəfər Behbudov Azərbaycan və Ukrayna bəstəkarlarının mahnılarını ifa edib. Kiyevdə 1 nömrəli Qafqaz xalq rəqsləri məktəbinin “Qafqaz” ansamblının ifasında Azərbaycan xalq rəqsləri də tədbir iştirakçılarına xoş əhval-ruhiyyə bəxş edib. Qonaqlara Azərbaycan mətbəxinin ləziz yeməkləri təqdim olunub.

* * *

Dünya Azərbaycanlılarının Həmrəylik Günü və Yeni il münasibətilə Azərbaycan İsveç Federasiyasının təşkilatçılığı və ölkəmizin İsveçdəki səfirliyinin dəstəyi ilə Stokholmda bayram konserti keçirilib. Tədbirdə Azərbaycanın İsveçdəki səfiri Adış Məmmədov, səfirliyin əməkdaşları, Azərbaycan və türk diasporlarının, İsveç ictimaiyyətinin nümayəndələri iştirak ediblər. Rəsmi hissədən sonra tədbirdə müğənni Könül Məmmədlinin rəhbərlik etdiyi musiqi qrupu muğam, xalq mahnıları və milli rəqslərlə müşayiət olunan konsert proqramı ilə çıxış edib.

Mədəniyyət.- 2015.- 30 dekabr.- S. 12.