Mədəniyyət və turizm naziri ATƏT və BMT təmsilçiləri ilə görüşüb

Bakıda keçiriləcək III Dünya Mədəniyyətlərarası Dialoq Forumu ilə bağlı fikir mübadiləsi aparılıb

Mədəniyyət və turizm naziri Əbülfəs Qarayev fevralın 10-da ATƏT-in Bakıdakı layihə əlaqələndiricisi Aleksis Şahtaxtinskini qəbul edib.

Görüşdə bu ilin 18-19 may tarixində Bakıda keçiriləcək III Dünya Mədəniyyətlərarası Dialoq Forumu ilə bağlı fikir mübadiləsi aparılıb. Forumun beynəlxalq arenada böyük maraq oyatdığını diqqətə çatdıran Aleksis Şahtaxtinski tədbir çərçivəsində rasizmə qarşı mübarizə və tolerantlıq mövzularında birgə sessiyanın keçirilməsini təklif edib. Nazir təklifi təqdirəlayiq hesab etdiyini deyib.

Əbülfəs Qarayev əlavə edib ki, Dünya Mədəniyyətlərarası Dialoq Forumu beynəlxalq formatda tədbir olduğundan burada gündəliyə çıxarılan hər bir məsələ tərəfdaş qurumlar ilə işçi qrupunun görüşlərində birgə razılaşdırılır. Sözügedən təklifin gündəliyə çıxarılması məsələsi konkret layihə təklifi alındıqdan sonra nəzərdən keçiriləcək.

* * *

Həmin gün Mədəniyyət və turizm naziri Əbülfəs Qarayev BMT-nin İnkişaf Proqramının (UNDP) ölkəmizdəki rezident əlaqələndiricisi Antonius Broek ilə də görüşüb.

Görüşdə UNDP-nin Azərbaycanda həyata keçirdiyi layihələr barədə məlumat verilib. Antonius Broek nazirin bu ilin yanvar ayında Nyu-Yorka səfəri çərçivəsində keçirilən tədbirlərin, eləcə də BMT rəsmiləri ilə görüşlərin böyük rezonans doğurduğunu diqqətə çatdırıb.

Nazir bildirib ki, Dünya Mədəniyyətlərarası Dialoq Forumuna BMT-nin üç əsas ixtisaslaşmış qurumunun - UNESCO, Sivilizasiyalar Alyansı və Dünya Turizm Təşkilatının cəlb olunması Azərbaycanın bu qurumla çoxşaxəli əməkdaşlığının bariz nümunəsidir.

Qeyd edilib ki, UNDP çərçivəsində ölkəmiz ilə turizm sahəsində əməkdaşlıq üçün geniş imkanlar mövcuddur. Bütün təkliflər Azərbaycan qanunvericiliyinə uyğunlaşdırıldıqdan sonra onların həyata keçirilmə mexanizmləri ətraflı nəzərdən keçirilə bilər. Bu təkliflər eyni zamanda may ayında Bakıda keçiriləcək III Dünya Mədəniyyətlərarası Dialoq Forumu çərçivəsində "Mədəniyyət və davamlı inkişaf 2015 gündəliyi" ilə əlaqələndirilə bilər.

Mədəniyyət.- 2015.- 13 fevral.- S. 4.