“Sotheby's” hərrac evində azərbaycanlı rəssamın sərgisi

Londonda “Buta” Azərbaycan incəsənəti festivalı davam edir

Böyük Britaniyanın paytaxtındakı “Sotheby's” hərrac evində tanınmış azərbaycanlı rəssam, milli təsviri sənətdə nonkonformizmin banilərindən sayılan Cavad Mircavadovun (1923-1992) sərgisi açılıb. Sərgi “Buta” İncəsənət Mərkəzinin təşkilatçılığı ilə Londonda keçirilən II beynəlxalq “Buta” Azərbaycan incəsənəti festivalı çərçivəsində təşkil olunub.

Sərginin açılış mərasimində Heydər Əliyev Fondunun vitse-prezidenti Leyla Əliyeva və Arzu Əliyeva iştirak ediblər.

“Buta” İncəsənət Mərkəzinin baş direktoru Nəsib Piriyev həyata keçirdikləri layihələrdən bəhs edib, ötən ilin noyabrından Londonda gerçəkləşən incəsənət festivalının növbəti tədbirləri haqqında məlumat verib.

Sərginin kuratoru, müasir incəsənət mütəxəssisi Fərəh Piriyeva Azərbaycanın istedadlı rəssamlarının əsərlərinin dünyada böyük maraq doğurduğunu diqqətə çatdırıb. Qeyd edilib ki, Cavad Mircavadov Azərbaycan rəssamlarının ən istedadlı nümayəndələrindən biri olub. O, sənətsevərlər tərəfindən XX əsrin görkəmli Azərbaycan rəssamı kimi tanınır. Yaradıcılığı formaca müasirliyə, məzmunca milli incəsənətin ənənələrinə əsaslanır.

“Sotheby's” hərrac evinin baş direktorunun müavini Lord Poltimore Azərbaycan incəsənətinin dünya sənət aləmində özünəməxsus yeri olduğunu qeyd edib. O, azərbaycanlı rəssamın sərgisinə ev sahibliyi etməkdən məmnunluqlarını ifadə edib.

Sonra sərgiyə baxış olub. Sərgidə rəssamın “Tanrının anası” (“Mother of God”, 1987) əsəri nümayiş olunur. Burada həmçinin milli Azərbaycan xalçaları sərgilənir.

Londonda “Buta” Azərbaycan incəsənəti festivalı mart ayında yekunlaşacaq. Festivalın son tədbiri olaraq Böyük Britaniya paytaxtında Novruz bayramı ilə bağlı mərasim keçiriləcək.

Mədəniyyət.- 2015.- 20 fevral.- S. 8.