"Milli mədəniyyətimizin təməli"

Jurnalistlər arasında yazı müsabiqəsi

Bakı Şəhər Mədəniyyət və Turizm İdarəsinin təşkilatçılığı ilə Azərbaycan milli mətbuatının 140 illiyi ilə əlaqədar kütləvi informasiya vasitələrinin təmsilçiləri arasında "Milli mədəniyyətimizin təməli" adlı məqalə müsabiqəsi keçirilir.

İdarədən bildirilib ki, müsabiqənin keçirilməsində məqsəd xalqımızın milli-mənəvi dəyərlərinin, Bakıətrafı qəsəbələrin milli adət-ənənələrinin, folklorunun, görkəmli şəxsiyyətlərin həyat və yaradıcılığının, tarixi abidələrin araşdırılması və təbliği, müvafiq sahədə istedadlı şəxslərin yaradıcılığına dəstək verilməsidir.

Müsabiqəyə iyulun 1-dən noyabrın 15-dək qəzetlərdə dərc edilən məqalələr təqdim olunmalıdır. İştirak üçün yaş məhdudiyyəti yoxdur.

Müəllifin konkret kütləvi informasiya vasitəsində çalışması şərtdir. Müəlliflər hər nominasiya üzrə ikidən artıq məqalə təqdim edə bilməzlər. Məqalələr Azərbaycan dilində, həcmi 5 min işarədən çox olmamalıdır. Qaliblər "Tarixi abidələr", "Folklor və milli adət-ənənələr" və "Görkəmli və tarixi şəxsiyyətlər" üzrə ən yaxşı məqalə nominasiyalarında mükafatlandırılacaqlar. Məqalələr Bakı Şəhər Mədəniyyət və Turizm İdarəsinin informasiya və ictimaiyyətlə əlaqələr sektoruna (əlaqə telefonu: (012) 497-03-55, email: turizm.informasiya@mail.ru) müəlliflər tərəfindən şəxsən təqdim olunmalıdır.

Mədəniyyət.-2015.- 3 iyul.- S. 14.