Xalq artisti Sofiya Hüseynova vəfat edib

Azərbaycan mədəniyyətinə itki üz verib. Xalq artisti, Prezident təqaüdçüsü Sofiya Hüseynova iyulun 30-da, 89 yaşında dünyasını dəyişib.

Sofiya Həsən qızı Hüseynova 1926-cı il fevralın 17-də Naxçıvanda anadan olub. Anası Xədicə Qazıyeva Naxçıvan teatrının ilk azərbaycanlı aktrisası idi. Onun yolunu davam etdirən Sofiya hələ orta məktəbdə oxuyarkən uşaq rollarında səhnəyə çıxıb. 1944-cü ildən teatrın truppasına daxil olub. 1945-ci ildə qısa müddət Zaqatala Dram Teatrında işlədikdən sonra yenə Naxçıvana qayıdıb. Uzun illər C.Məmmədquluzadə adına Naxçıvan Dövlət Musiqili Dram Teatrının aparıcı aktrisası olub. 1950-ci illərdə bir müddət Naxçıvanın «Araz» Dövlət Mahnı və Rəqs Ansamblında rəqs qrupunun solisti kimi də fəaliyyət göstərib.

Naxçıvan teatrında tamaşaya qoyulmuş Azərbaycan və dünya dramaturgiyasının ən gözəl nümunələrində yaddaqalan obrazlar yaradıb.

Aktrisa 1 iyun 1974-cü ildə Azərbaycanın Əməkdar artisti, 1 dekabr 1982-ci ildə Xalq artisti fəxri adlarına layiq görülüb. 1996-cı ildə «Şöhrət» ordeni ilə təltif edilib. 2002-ci ildən Prezident təqaüdçüsü idi.

Mədəniyyət və Turizm Nazirliyinin rəhbərliyi və kollektivi Xalq artisti Sofiya Hüseynovanın vəfatından kədərləndiyini bildirir və mərhumun ailəsinə, yaxınlarına dərin hüznlə başsağlığı verir.

Allah rəhmət eləsin.

Mədəniyyət.-2015.- 31 iyul.- S. 2.