Azərbaycan alimi Türkiyədə beynəlxalq simpoziumda çıxış edib

Azərbaycan Milli Elmlər Akademiyası (AMEA) Folklor İnstitutunun folklor və yazılı ədəbiyyat şöbəsinin böyük elmi işçisi, filologiya üzrə fəlsəfə doktoru Fidan Qasımova Türkiyənin Antalya şəhərində keçirilən “Altay topluluqları: din və inanc ayinləri - dil və tarix məsələləri” adlı beynəlxalq simpoziumda məruzə ilə çıxış edib.

İyulun 20-dən 22-dək davam edən simpoziumda Azərbaycan, Türkiyə, Qazaxıstan, Qırğızıstan, Özbəkistan, Rusiya, Koreya, Yaponiya, Almaniya, Macarıstan, Bolqarıstan və ABŞ-dan 150-dək elm adamı iştirak edib. Tədbirdə Altay topluluqlarının din, dil, tarix, yaşayış, adət-ənənə və inancları ilə bağlı araşdırmaların nəticələri müzakirə edilib. Simpozium çərçivəsində Korkuteli rayonuna aid olan İmecik yaylasına çıxan alimlər burada köçərilərin adət-ənənələri və həyat tərzlərini yerində araşdırmaq imkanı əldə ediblər.

Mədəniyyət.-2015.- 31 iyul.- S. 5.