Mətbuat Şurası mükafata layiq görülüb

Xəbər verdiyimiz kimi, mayın 27-dən 31-dək Rusiya Federasiyası Tatarıstan Respublikasının Kazan şəhərində Türk Dünyası Jurnalistləri Şurasının II toplantısı keçirilib.

20 ölkədən 200-dən artıq nümayəndənin qatıldığı tədbirdə ölkəmizi Azərbaycan Mətbuat Şurasının sədri Əflatun Amaşov və qurumun idarə heyətinin üzvü, Orta Asiya və Güney Qafqaz Söz Azadlığı Şəbəkəsinin sədri Azər Həsrət təmsil edib.

Toplantı iştirakçıları öncə gətirdikləri qəzet və jurnalların nümunələri əsasında hazırlanmış sərgi ilə tanış olublar. Sərgidə Azərbaycan guşəsi böyük maraqla qarşılanıb.

Tədbirdə dünyada söz və ifadə azadlıqlarının vəziyyəti ilə bağlı hesabatlar açıqlanıb, türk dünyasının müştərək problemlərinə münasibətdə medianın yanaşma tərzini əks etdirən məqamlar təhlil edilib.

Mətbuat Şurasının sədri Ə.Amaşov toplantıdakı məruzəsində türk dünyası ilə bağlı media qurumlarının əhəmiyyətindən danışıb. Qloballaşan dünyada ənənəvi mediadan onlayn mediaya keçidin xüsusiyyətlərindən, türk dünyası mediasının mövcud dünya düzənində rolundan söz açan Ə.Amaşov rəhbərlik etdiyi qurumun fəaliyyət istiqamətlərinə də toxunub, Azərbaycanda jurnalistikanın vəziyyəti barədə məlumat verib.

Toplantıda Azərbaycan Mətbuat Şurası Türk Dünyası Jurnalistləri Federasiyasının “Türk dünyası media mükafatı”na layiq görülüb.

Mədəniyyət.- 2015.- 3 iyun.- S. 15.