Atletlər kəndində “Azərbaycan el sənəti”

I Avropa Oyunlarının Atletlər kəndindəki Mədəniyyət və Turizm Mərkəzində Azərbaycan Xalça Muzeyinin "Azərbaycan el sənəti" sərgisi təşkil edilib. Bu günlərdə Azərbaycan Respublikasının Prezidenti İlham Əliyev və xanımı, birinci Avropa Oyunları Təşkilat Komitəsinin sədri Mehriban Əliyeva I Avropa Oyunlarının Atletlər və Media kəndlərinin açılışında iştirak edərkən sərgi ilə də yaxından tanış olublar.

İyunun 8-dən “Azərbaycan el sənəti" sərgisi tədbir iştirakçılarını qəbul etməyə başlayıb. Sərgidə muzeyin kolleksiyasından olan xalça, xalça məmulatları, bədii metal, eyni zamanda zərgərlik, tikmə, milli geyim nümunələrini əks etdirən fotoşəkillər nümayiş olunur.

Dünyada şöhrəti günü-gündən artan Azərbaycan xalçaları, maddi-mədəni irsimiz, qədim adət-ənənələrimiz, xalqımızın məişəti, fəlsəfəsi, dünyagörüşü sərgiyə gələn tamaşaçılarda böyük maraq oyadır. Qonaqlar hana arxasında xalça toxuyan toxuculara qatılaraq, xalçalarımızın toxunma texnologiyası ilə yaxından tanış olur, onlarla birgə xalça toxuyurlar. Qonaqlar milli geyimlərimizdə şəkil çəkdirməyə də böyük həvəs göstərirlər.

Mədəniyyət.- 2015.- 12 iyun.- S. 2.