“Azeri observer” jurnalının təqdimatı

Martın 4-də Azərbaycan Mətbuat Şurasının təşəbbüsü ilə ingilis dilində nəşr olunan “Azeri observer” jurnalının təqdimatı keçirilib. Əvvəlcə jurnalın baş redaktoru Arslan Abbasov nəşr haqqında qısa məlumat verib.

Mətbuat Şurasının sədri Əflatun Amaşov bildirib ki, jurnalda Azərbaycanın iqtisadi, mədəni həyatı, ölkəmizin tarixi, turizm potensialı haqqında materiallar, Azərbaycanda və dünyada baş verən hadisələrlə bağlı yazılar, xaricdəki səfirliklərimiz, diaspor təşkilatlarımızla bağlı məqalələr və müsahibələr yer alıb. Əsas məqsəd dünya xalqlarının bir-birilərini tanımasına, onların inteqrasiyasına, sivilizasiyalararası dialoqa töhfə verməkdir.

Mərasimdə jurnalın yeni fəaliyyətə başlamış İtaliya bürosunun işi barədə də söhbət açılıb. İtaliyanın Azərbaycandakı səfiri Ciampaolo Kutillo nəşrin İtaliya ilə əlaqələr yaratmasını yüksək qiymətləndirib. Jurnalın İtaliya bürosunun rəhbəri Covanni Bella İtaliya-Azərbaycan əlaqələrindən, nəşrin əlaqələrimizin daha da genişlənməsində oynayacağı roldan danışıb. Jurnalın baş direktoru, Əməkdar jurnalist Fazil Abbasov nəşr barədə məlumat verərək bildirib ki, nəşrin hər sayı Beynəlxalq Media Mərkəzinin www.newspaperdirect.com saytında yerləşdirilir ki, bu da dünya oxucularına Azərbaycan gerçəklikləri ilə tanış olmağa imkan verir. Məlumat verilib ki, jurnal “Assa-İrada” beynəlxalq xəbər agentliyi tərəfindən təsis edilib.

Mədəniyyət.- 2015.- 6 mart.- S. 8.