Mədəniyyət və turizm naziri əfsanəvi balerina Maya Plisetskayanın vəfatı ilə bağlı başsağlığı verib

Dünya şöhrətli balet ustası, Rusiya Böyük Teatrının solisti, SSRİ Xalq artisti, Sosialist Əməyi Qəhrəmanı Maya Plisetskaya mayın 2-də vəfat etmişdir. Bu münasibətlə mədəniyyət və turizm naziri Əbülfəs Qarayev Rusiya Federasiyasının mədəniyyət naziri Vladimir Medinskiyə başsağlığı məktubu göndərmişdir. Məktubda deyilir: "Böyük rus balerinası, SSRİ Xalq artisti Maya Plisetskayanın ölüm xəbəri bizi qəlbən sarsıtdı. Maya Plisetskaya dünya balet sənətinin əfsanəsi, parlaq, təkrarolunmaz ulduzu idi. Onun doğma Böyük Teatrın səhnəsində yaratdığı Karmen, Odetta-Odilliya, Avrora, Kitri, Anna Karenina obrazları dünya baletinin Olimpində etalona çevrilmiş və sənətkarı milyonlarla pərəstişkarının sevimlisi etmişdi. Maya Plisetskayanın yüksək professionallığı, parlaq ustalığı, əvəzsiz artistizmi, insani keyfiyyətləri ona təkcə Rusiyada deyil, onun hüdudlarından kənarda da dərin hörmət və məhəbbət qazandırmışdı".

Məktubda qeyd olunur ki, Maya Plisetskaya Azərbaycan xalqının da böyük dostu idi: "Ölkəmizdə onun pərəstişkarlarının və dostlarının sayı az deyil. Balerinanın ölkəmizə sonuncu səfəri və ümummilli lider Heydər Əliyevlə görüşü bizim yaddaşlarımızda əbədi yaşayır. O, öz sənəti, humanistliyi və xeyirxah əməlləri ilə dünyamızı bəzəyirdi. Azərbaycan xalqının yaradıcı insanları Maya Plisetskayanın vəfatından dərin kədərini bildirir və əfsanəvi balerinanın yaxınlarına dərin hüznlə başsağlığı verirlər".

Qeyd edək ki, Maya Plisetskaya 90 yaşında Almaniyada dünyasını dəyişib. O, 1925-ci ildə Moskvada anadan olub. Böyük Teatrın səhnəsində 50 ildən artıq tamaşada əsas partiyalarda çıxış edib, bir çox ölkələrin fəxri ad və mükafatlarına layiq görülüb. Balerina ömrünün son illərini Münxen şəhərində yaşayıb.

Mədəniyyət.- 2015.- 6 may.- S. 6.