Kazanda Türk Dünyası Jurnalistləri Şurasının toplantısı

Tatarıstanın Kazan şəhərində Türk Dünyası Jurnalistləri Şurasının II toplantısı keçirilir. Azərbaycan Mətbuat Şurasının sədri Əflatun Amaşov toplantıda iştirak edir. Şura sədri 20 ölkədən 200-dən artıq nümayəndənin iştirak etdiyi tədbirdə qloballaşan dünyada ənənəvi mediadan onlayn mediaya keçidin xüsusiyyətlərinə, türk dünyası mediasının mövcud dünya düzənində roluna dair məruzə edəcək.

Mayın 29-dək davam edəcək tədbirdə dünyada söz və ifadə azadlıqlarının vəziyyəti ilə bağlı hesabatlar açıqlanacaq, türk dünyasının müştərək problemlərinə münasibətdə kütləvi informasiya vasitələrinin səfərbəredici missiyasına nəzər salınacaq. Səfər çərçivəsində Tatarıstan Respublikasının rəsmiləri, ictimaiyyət nümayəndələri ilə görüşlər də nəzərdə tutulur. Qeyd edək ki, Türk Dünyası Jurnalistləri Şurasının ilk toplantısı ötən il Əskişəhərdə (Türkiyə) keçirilib.

Mədəniyyət.- 2015.- 27 may.- S. 5.