Elmi əməkdaşlıq əlaqələri genişlənir

Noyabrın 19-da Mədəniyyət və Turizm Nazirliyinin Mədəniyyətşünaslıq üzrə Elmi-Metodik Mərkəzi ilə AMEA-nın Nizami adına Ədəbiyyat İnstitutu arasında əməkdaşlıq memorandumu imzalanıb. Mərasimdə Ədəbiyyat İnstitutunun direktoru, AMEA-nın vitse-prezidenti, akademik İsa Həbibbəyli, institutun şöbə müdiri, professor Asif Rüstəmli, Elmi-Metodik Mərkəzin direktoru, siyasi elmlər üzrə fəlsəfə doktoru Asif Usubəliyev, mərkəzin elmi araşdırmalar şöbəsinin müdiri Rafiq Quliyev iştirak ediblər.

Memorandumda UNESCO-nun maddi və qeyri-maddi irs üzrə reprezentativ siyahısına daxil edilmiş Azərbaycan mədəni irs nümunələrinin qorunması, tədqiqi və təbliği, respublikamızın uğurlu mədəni inkişafı və xalqımızın tarixi ənənəsinin dünyaya daha da yaxından tanıdılması istiqamətində aparılan davamlı dövlət siyasətinə birgə təşəbbüslərlə dəstək verilməsi, milli mətbuatımızın nadir nümunələrinin xarici ölkə arxivlərindən aşkar edilməsi və elektron variantının gətirilməsi, “Azərbaycan milli mətbuatının salnaməsi” ensiklopediyasının hazırlanması və elektron versiyasının yaradılması və digər istiqamətlər nəzərdə tutulub. Memorandumun icrası üzrə ekspertlərdən ibarət işçi qrupunun yaradılması planlaşdırılır.

Mədəniyyət.- 2015.- 20 noyabr.- S. 6.