Ölkəmiz İCCROM-un iclasında təmsil olunub

Qlobal iqlim dəyişikliyinin mədəni irs obyektlərinə təsiri müzakirə edilib

Noyabrın 18-dən 20-dək İtaliyanın paytaxtı Romada Mədəni Mülkiyyətin Mühafizəsi və Bərpasının Öyrənilməsi üzrə Beynəlxalq Mərkəzin (İCCROM) Baş Assambleyasının 29-cu sessiyası keçirilib.

Sessiyada Mədəniyyət və Turizm Nazirliyi Tarixi-mədəniyyət abidələrinin istifadəsi və mühafizəsi şöbəsinin əməkdaşı Qasım Şirinli iştirak edib.

130-dan çox ölkənin nümayəndə heyətinin qatıldığı və 28 beynəlxalq institutun müşahidəçi qismində iştirak etdiyi tədbir Birləşmiş Millətlərin Ümumdünya Ərzaq və Kənd Təsərrüfatı Təşkilatının mənzil-qərargahında gerçəkləşib.

Tədbirin açılışında Baş Assambleyanın müvəqqəti prezidenti Anna Skobel, BM Ümumdünya Ərzaq və Kənd Təsərrüfatı Təşkilatının baş direktorunun müavini Daniel Qustafson, İtaliyanın mədəni irsin qorunması üzrə naziri Dario Francesçini və İCCROM-un baş direktoru Stefano de Karo çıxış ediblər.

Sonra Baş Assambleyaya yeni qəbul edilmiş dövlət - Rusiya Federasiyasının təqdimatı keçirilib, eləcə də təşkilatın hər iki ildə bir elan edilən “İCCROM Award” mükafatının təqdimatı olub.

Sessiyada digər mövzularla yanaşı qlobal iqlim dəyişikliyinin dünyada qorunan mədəni irs obyektlərinə təsiri barədə də geniş müzakirələr aparılıb.

Mədəniyyət.- 2015.- 25 noyabr.- S. 6.