Tanınmış karikatura ustası dünya turunda

Azərbaycanın məşhur karikatura ustası, yüzdən artıq mükafata layiq görülmüş, 40-dan çox beynəlxalq karikatura müsabiqəsinin jürisində yer almış Seyran Cəfərli bu yaxınlarda Kolumbiyada keçirilən 22-ci beynəlxalq "Rendoncartoon" karikatura yarışmasının münsiflər heyəti tərkibində iştirak edib.

Seyran Cəfərli bildirib ki, müsabiqəyə Rio Negro şəhər meri Hernan Ospina Sepulveda və yarışma meneceri Fernando Picanın xüsusi dəvəti ilə qatılıb. Təqdimetmə və açılış mərasimində söz alan Seyran Cəfərli Azərbaycan və Kolumbiya arasında mədəni əlaqələrin bundan sonra da inkişaf edəcəyini, hər iki ölkə sənətçilərinin birgə yaradıcılıq mübadiləsinin vacibliyini qeyd edib. Rəssam rəhbəri olduğu "Beynəlxalq Karikatura Xəbər Mərkəzi" saytının xüsusi medalını karikaturanın inkişafında xidmətlərinə görə Rio Negro şəhərinin merinə və yarışma menecerinə təqdim edib. On gün davam edən tədbirdə qonaqlar şəhərin görməli yerləri ilə yaxından tanış olublar.

Qeyd edək ki, karikatura ustasının uğurları bununla bitmir. Seyran Cəfərli oktyabr ayında Kosovoda və Çində keçirilən Beynəlxalq karikatura yarışmalarının da münsiflər heyəti tərkibinə dəvət alıb. O, bundan əlavə Serbiyada keçirilən anti-müharibə mövzulu beynəlxalq karikatura yarışmasının xüsusi mükafatına layiq görülüb.

Mədəniyyət.- 2015.- 9 oktyabr.- S. 11.