Fransada mədəniyyət və mətbəximizin təqdimatı

Xəbər verdiyimiz kimi, ölkəmiz Fransanın Aşağı Normandiya regionunun Orn departamentində təşkil olunan Montiyi Sen Deni festivalında ilk dəfə fəxri qonaq qismində iştirak edib.

Festival çərçivəsində ziyarətçiləri maraqlandıran iştirakçı ölkələr haqqında radio ilə birbaşa yayım olub. Azərbaycanla bağlı yayımda səfir Elçin Əmirbəyov ölkəmizin tarixi, mədəniyyəti, incəsənəti haqqında geniş məlumat verib. Azərbaycanın Dostları Assosiasiyasının baş katibi, “Azərbaycan Evi”nin sədri, Mirvari Fətəliyeva milli əl işləri haqqında, qurumun sədr müavini Mehri Quliyeva isə ləziz mətbəximizin nümunələri barədə məlumat verərək onların hazırlanma prosesini təqdim edib. Azərbaycan mətbəxi nümunələrinin dadına baxan ziyarətçilər ölkəmizin pavilyonunun fəallığından razılıqlarını bildiriblər.

Bakı Xoreoqrafiya Akademiyasının “Bakı ulduzları” rəqs ansamblının ifaları da böyük maraqla qarşılanıb.

Oktyabrın 8-9-da Fransanın Orn departamentinin Sees və Banyol şəhərlərində “Azərbaycan musiqi gecəsi” adlı konsert proqramı təşkil edilib. Proqramda gənc cazmen, pianoçu Etibar Əsədli Azərbaycan bəstəkarlarının əsərlərini ifa edib. Sonra “Bakı ulduzları” ansamblı Azərbaycan milli rəqslərini ifa edib.

Ölkəmiz bugünlərdə Paris şəhərinin 7-ci rayonunun meriyası tərəfindən “Dadlılar həftəsi” çərçivəsində rayonun ərazisində fəaliyyət göstərən səfirliklər və mədəniyyət mərkəzlərinin iştirakı ilə keçirilən mətbəx sərgisində də təmsil olunub. Sərgidə Fransadakı səfirliyimizin təşkilati dəstəyi ilə “Azərbaycan Evi” təmsil edib. Azərbaycan stendində milli mətbəximizin nümunələri - şəkərbura, paxlava, meyvə şirələri və mürəbbələrlə yanaşı, milli adət-ənənələrimizi əks etdirən eksponatlar, ölkəmiz haqqında fransız dilində nəşr edilmiş müxtəlif çap məhsulları da təqdim edilib.

Mədəniyyət.- 2015.- 16 oktyabr.- S. 16.