Yerlərdə vətəndaş təşəbbüskarlığı mədəniyyət və turizmin inkişafına kömək edir

Mədəniyyət və turizm nazirinin əhali ilə növbəti görüşü Goranboy şəhərində keçirildi

Azərbaycan Respublikasının Prezidenti İlham Əliyevin tapşırığına əsasən mərkəzi icra hakimiyyəti orqanları rəhbərlərinin şəhər və rayonlarda vətəndaşlarla görüşləri davam edir. Mədəniyyət və turizm naziri Əbülfəs Qarayev avqustun 28-də Goranboy şəhərindəki Heydər Əliyev Mərkəzində Goranboy, Tərtər, Bərdə, Yevlax, Ağcabədi, Xocalı və Laçın rayonlarından vətəndaşları qəbul edib.

Görüşdən öncə nazir Goranboy şəhərində ümummilli lider Heydər Əliyevin abidəsi önünə tər gül dəstəsi qoyaraq xatirəsini ehtiramla yad edib.

Nazirliyin məsul işçilərinin iştirak etdikləri qəbulda səslənən müraciətlər yerlərdə mədəniyyət müəssisələrinin, musiqi və incəsənət məktəblərinin fəaliyyətinin yaxşılaşdırılması, tarixi abidələrin təmir-bərpası, turizmin inkişaf etdirilməsi, mədəniyyət ocaqlarında ixtisaslı kadrlara tələbat, işlə təminat və digər məsələlərlə bağlı olub.

Goranboy rayonundan qəbula yazılan vətəndaşlar rayondakı mədəniyyət evləri və klub işçilərinə metodiki köməklik üçün qabaqcıl mədəniyyət mərkəzlərindən işçilərin ezam olunması, mədəniyyət müəssisələrinin işinin əlaqələndirilməsi, kitabxanaların fəaliyyətinin təkmilləşdirilməsi məqsədilə respublikanın tanınmış kitabxanaçıları ilə görüş və treninqlərin təşkili, eləcə də Şətəl qala ərazisində arxeoloji qazıntı işlərinin aparılması və Mirzə Adıgözəl bəyin türbə kompleksinin təmiri barədə xahişlərini diqqətə çatdırıblar.

Laçın rayonundan məcburi köçkün vətəndaşların müraciəti işlə təminat, rayon Mədəniyyət Mərkəzi işçilərinin peşə hazırlığının artırılması məqsədilə nazirliyin ixtisaslı mütəxəssislərinin ezam edilməsi və Bakı şəhəri Binəqədi rayonu Mehdiabad qəsəbəsində məcburi köçkünlər üçün salınmış şəhərcikdə Laçın şəhər 2 saylı musiqi məktəbinin fəaliyyətinin təşkili barədə olub.

Tərtər rayonundan qəbula gələnlər uşaq musiqi məktəbinin musiqi ədəbiyyatı və nəzəriyyə kitabları ilə təminatı, rayon Mədəniyyət Mərkəzinin filiallarının işinin gücləndirilməsi üçün rəqs və artist paltarlarının verilməsi, Cəmilli kəndi ərazisində yerləşən XIX əsrə aid "Buzxana" tarixi abidəsinin bərpa edilməsi ilə bağlı xahiş ediblər.

Ağcabədi Rayon Tarix-Diyarşünaslıq Muzeyində aparılan əsaslı təmir işləri ilə əlaqədar kollektiv adından nazirliyə təşəkkür edilib və muzeyin ekspozisiyasının yenidən qurulmasına köməklik göstərilməsi xahiş olunub. Həmçinin Ağcabədi şəhəri ərazisində olan 3 klub müəssisəsinin Yaqub Məmmədov adına rayon Mədəniyyət Mərkəzinə birləşdirilməsi təşəbbüsü irəli sürülüb.

Bundan əlavə, qəbulda Yevlax şəhər Heydər Əliyev adına Saraya ixtisaslı xoreoqrafiya müəlliminin göndərilməsi, habelə bölgədə xoreoqrafiya mərkəzinin açılması, ali ixtisas təhsilli musiqi müəllimlərinə olan ehtiyacı, Mədəniyyət və Turizm Nazirliyinin Mədəniyyətşünaslıq üzrə Elmi-Metodik Mərkəzi tərəfindən yerlərdəki xalq teatrlarına səhnəyə qoyulması üçün birpərdəli pyes və əsərlərin göndərilməsi ilə bağlı müraciətlər edilib.

Bərdə rayonunda respublikanın tanınmış rəssamlarının əsərlərindən ibarət sərgilərin təşkili və gənc rəssamlar üçün ustad dərslərinin keçirilməsi, rayonda turizmin inkişaf etdirilməsi, turizm turlarının təşkil edilməsi məqsədilə tarixi tikililərdə (Bala bəyin evi və s.) bərpa-təmir işlərinin aparılması, Xocalı rayon Yaloba kənd tarix-diyarşünaslıq muzeyində tərtibat işlərinin görülməsi üçün metodiki köməklik ilə bağlı müraciətlər də olub.

Qəbula gələn bütün vətəndaşları diqqətlə dinləyən nazir Əbülfəs Qarayev müraciətlərdə yer alan məsələlərlə bağlı müvafiq göstərişlər verib.

Nazir jurnalistlərə müsahibəsində dövlət başçısının tapşırığı ilə yerlərdə mütəmadi olaraq keçirilən bu görüşlərin əhəmiyyətini qeyd edib. Vurğulanıb ki, vətəndaşlarla birbaşa ünsiyyət bir çox məsələlərin operativ şəkildə həllinə kömək edir. Nazir yerlərdə əhalinin mədəniyyət və turizm sahələrinin inkişaf etdirilməsi ilə bağlı təşəbbüskarlığını, fəal vətəndaş mövqeyini müsbət qiymətləndirib.

* * *

Qəbuldan sonra Əbülfəs Qarayev əsaslı təmir edilmiş Goranboy Rayon Tarix-Diyarşünaslıq Muzeyinə baş çəkib, burada yaradılan vəziyyətlə tanış olub. 1991-ci ildən fəaliyyət göstərən muzeydə bölgənin keçmişini və müasir tarixini əks etdirən 1200-dən çox eksponat var.

Nazir həmçinin Goranboy rayon MKS-nin Kitabxana-İnformasiya Mərkəzində, rayon Mədəniyyət Mərkəzi və Goranboy Şəhər Uşaq İncəsənət Məktəbində olub, bu mədəniyyət müəssisələrinin fəaliyyəti ilə bağlı tövsiyə və tapşırıqlar verib.

Mədəniyyət.- 2015.- 2 sentyabr.- S. 3.