Özbəkistanla mədəni-humanitar əməkdaşlıq inkişaf edir

Nizami Gəncəvi adına Daşkənd Dövlət Pedaqoji Universitetinin Azərbaycan Mədəniyyəti və Ədəbiyyatı Mərkəzində Özbəkistanın müstəqilliyinin 24-cü ildönümü ilə bağlı tədbir keçirilib. Tədbir ölkəmizin Özbəkistandakı səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzi (AMM) ilə birgə təşkil olunub.

Özbəkistan-Azərbaycan Dostluq Cəmiyyətinin icraçı direktoru Erkin Nuriddinov bu münasibətlə müəllim və tələbələri təbrik edib, Özbəkistanla Azərbaycan arasındakı dostluq əlaqələrinin tarixindən danışıb.

Səfirliyin birinci katibi, AMM-nin direktoru Samir Abbasov bildirib ki, ölkələrimiz arasında siyasi, iqtisadi, mədəni və digər sahələrdə əlaqələr inkişaf edir. Xalqlarımızın tarixi, mədəniyyəti, incəsənəti, adət-ənənələri çox yaxındır və bu da qardaşlığımızın dərin köklərə söykəndiyindən xəbər verir.

Filologiya elmləri doktoru İbrahim Yuldaşev, dossent Gülbahar Aşurova, professor Səadət Məhəmmədova, Özbəkistan-Azərbaycan Dostluq Cəmiyyəti sədrinin müavini İsrail Şamsimuxammedov və başqaları mədəni-humanitar sahələrdə əlaqələrimizin get-gedə inkişaf etdiyini bildiriblər.

Mədəniyyət.- 2015.- 18 sentyabr.- S. 10.