Mədəni irs, iqtisadi inkişaf, turizm və media

Azərbaycanlı alim və tədqiqatçılar beynəlxalq konfransda iştirak ediblər

Yanvarın 17-18-də Makedoniyanın Ohrid şəhərində “Mədəni irs, yerli iqtisadi inkişaf, turizm və media arasında interdisiplinar əlaqələrə baxış” mövzusunda üçüncü beynəlxalq konfrans keçirilib. Konfransı Makedoniya Sosial Mədəni Antropologiya İnstitutu, “ESRA” Audiovizual İncəsənət Universiteti, “HAEMUS” Elmi Tədqiqatlar və Mədəniyyətin İnkişafı Mərkəzi və Azərbaycanın “MİRAS” Mədəni İrsin Öyrənilməsinə Kömək İctimai Birliyi təşkil edib.

Tədbirin açılışında Makedoniya Sosial Mədəni Antropologiya İnstitutunun direktoru Rubin Zemon, Ohrid şəhəri merinin müavini Angel Janev, “MİRAS” İctimai Birliyinin sədri Fariz Xəlilli, “HAEMUS” Elmi Tədqiqatlar və Mədəniyyətin İnkişafı Mərkəzinin sədri Vasilka Dimitrovska, tarix elmləri doktoru Qafar Cəbiyev və başqaları çıxış ediblər.

Makedoniya, Albaniya, Rusiya, Litva, Bolqarıstan, Polşa və digər ölkələrdən nümayəndələrin qatıldığı konfransda Azərbaycanı 15-dək alim və tədqiqatçı təmsil edib.

Alimlərimizin “Azərbaycanda tarixi mədəni irsin mühafizəsi və təbliğində televiziyaların rolu”, “Mədəni irsin mühafizəsində muzeylərin rolu və problemləri”, “Azərbaycanın milli muzeyləri”, “İsmayıllının mədəni irsi və turizm”, “Turizm baxımından tarixi abidələrin təbliği” və digər mövzularda məruzələri dinlənilib.

“MİRAS” İctimai Birliyinin reallaşdırdığı “Təmiz kənd - yerli icmaların iştirakı ilə ekoloji və etnoqrafik identikliyin qorunması və davamlı inkişafı” layihəsinin təqdimatı da maraq doğurub. İştirakçılar layihənin təcrübəsini öz ölkələrində davam etdirmək arzularını bildiriblər.

Mədəniyyət.- 2015.- 21 yanvar.- S. 8.