Şotlandiya qəzeti “Bakı-2015” Avropa Oyunları haqqında

Şotlandiyanın “Daily Record” qəzetində Bakıda keçiriləcək Avropa Oyunları haqqında məqalə dərc olunub. Məqalədə “Glasgow-2014” oyunlarının təşkilat komitəsində çalışmış, hazırda isə “Bakı-2015” Avropa Oyunlarının beynəlxalq yayım xidmətinin meneceri xanım Hizer Neilin paytaxtımızda keçiriləcək möhtəşəm idman tədbiri haqqında fikirlərinə yer verilib. O qeyd edir ki, Bakıda bu tədbirin həyəcanını indidən duymaq mümkündür. Paytaxtımız haqqında təəssüratlarını bölüşən menecer Bakı sakinlərinin qonaqpərvər, şəhərin isə çox gözəl olduğunu diqqətə çatdırıb.

Yazıda həmçinin Avropa Oyunlarında təmsil olunacaq idman növləri, iştirakçı ölkələr və digər təşkilati məsələlərdən bəhs edilir. Məqalənin sonunda “Glasgow-2014”ün baş icraçı direktoru David Qrevemberqin sözlərinə istinadən “Bakı-2015 Avropa Oyunları”nın dünyanın növbəti möhtəşəm idman tədbiri olacağı diqqətə çatdırılır.

Mədəniyyət.- 2015.- 23 yanvar.- S. 15.