“Molla Nəsrəddin” İslam dünyasında böyük bir yenilik idi

İtaliyanın “Linkiesta” portalında “Molla Nəsrəddin” jurnalı ilə bağlı yazı dərc olunub. Yazıda qeyd olunur ki, 1906-cı ildə işıq üzü görən bu nəşrin əsas təşəbbüskarı və müəllifi Azərbaycanın görkəmli yazıçı-dramaturqu Cəlil Məmmədquluzadə olub. Qısa zamanda bütün İslam dünyasında böyük maraqla qarşılanan jurnal İran, Türkiyə, Misir, Hindistan, Mərakeş kimi ölkələrdə də yayılaraq oradakı xalqların sosial-mədəni tərəqqisinə müsbət təsirini göstərib. Jurnalda yumor və satira vasitəsilə yerli elitanın tənqid edilməsi, sosial bərabərsizlik və dini fanatizm kimi mənfi halların tənqidi öz əksini tapıb. Məqalədə jurnalı İslam dünyasının ən məşhur satirik nəşri kimi təqdim edən müəllif yazır: “Əslində İslam dünyasında çox böyük bir yenilik olan bu jurnal Qərb ideyalarına və ənənələrinə yaxınlaşmanın bir təzahürü idi”.

Mədəniyyət.- 2015.- 23 yanvar.- S. 10.