Misir Bakı-Qahirə birbaşa aviareysinin açılmasını istəyir

Bu ölkənin Turizm Nazirliyi nümayəndə heyətinin Azərbaycana səfəri gözlənilir

“Bakı ilə Qahirə arasında birbaşa hava reysinin açılması Misir-Azərbaycan turizm əlaqələrinin inkişafına öz töhfəsini verəcək”.

Bu barədə Misir Ərəb Respublikası Turizm Nazirliyinin Beynəlxalq turizm şöbəsinin başçısı Məhəmməd Əbd Əl-Cabbar bu ölkədə səfərdə olan azərbaycanlı jurnalistlərlə görüşü zamanı deyib.

O bildirib ki, Azərbaycandan Misirə gələnlərin sayı o qədər də çox deyil: “Biz Azərbaycanla turizm əlaqələrini inkişaf etdirmək istəyirik. Əsas problemlərdən biri birbaşa hava əlaqəsinin olmamasıdır. Biz birbaşa hava əlaqəsinin yaranması üçün çalışmalıyıq və düşünürəm ki, bununla da turizmin inkişafına yardım etmiş olacağıq”.

Azərbaycan və Misir şirkətləri arasında turizmin inkişafı ilə bağlı müzakirələrin vacibliyindən danışan Məhəmməd Əbd Əl-Cabbar qeyd edib ki, Misir Azərbaycan və Qazaxıstan kimi ölkələrlə uzun müddətdir ki, əlaqələr qurub: “Çox istərdik ki, bu ölkələrin turizm bazarları ilə maraqlanaq. Məsələn, Qazaxıstandan Şarm Əl-Şeyxə bu yaxınlarda birbaşa reys açılıb. Biz bu təcrübənin Azərbaycana münasibətdə də təkrarlanmasını istərdik”.

Misir Turizm Nazirliyinin rəsmisi əlavə edib ki, turizm sahəsində ikitərəfli münasibətlərin inkişafı ilə bağlı nazirliyin nümayəndə heyətinin Azərbaycana səfəri gözlənilir. “Misir turizm nazirinin Azərbaycana ötən ilin dekabrına planlaşdırılan səfəri təxirə salınmışdı. Lakin bu səfər baş tutacaq və nümayəndə heyətinin tərkibinə Misir turizm və aviasiya şirkətlərinin nümayəndələri də daxil olacaq”, - deyə o bildirib.

Mədəniyyət.- 2016.- 1 aprel.- S. 9.