İsraildə xatirə gecəsi

İsrail-Azərbaycan Beynəlxalq Assosiasiyası (“Azİz”) hər il Azərbaycanın görkəmli müğənni və bəstəkarı Müslüm Maqomayevin xatirəsinə həsr edilmiş müxtəlif tədbirlər keçirir. Bu dəfə Netaniya şəhərinin (İsrail) mədəniyyət sarayında müğənninin doğum gününə həsr edilmiş tədbir keçirilib.

Lilya Boqatıryova və Rita Rakovşik tərəfindən tərtib edilmiş konsert proqramına Tomer Əliyev və Sergey İlyasafovun ifasında Müslüm Maqomayevin repertuarından olan mahnılarla yanaşı, İraida Paninanın ifasında müasir mahnılar da daxil idi. Gənc vokalçı Timoti Sannikov idiş dilində mahnılar oxuyub, skripkaçılar Aleksandr Spivak və Yelena Borisova-Spivak isə Azərbaycanın dahi bəstəkarları Üzeyir Hacıbəylinin və Fikrət Əmirovun əsərlərini ifa ediblər.

“Azİz” assosiasiyası nəzdində Azərbaycan Mədəniyyət Mərkəzinin direktoru Yeganə Salman Müslüm Maqomayevin həyat və yaradıcılığı barədə məlumat verib, yazıçı və jurnalist Mark Kotlyarski isə müğənni haqqında xatirələrini bölüşüb.

Mədəniyyət.- 2016.- 19 avqust.- S.5.