Media dini radikalizmə qarşı mübarizədə fəal olmalıdır

“Media yalnız informasiya ötürücüsü olmamalı, hadisələrə münasibət bildirməlidir”

Tədbirdə çıxış edən Mətbuat Şurasının sədri, millət vəkili Əflatun Amaşov dini radikalizmə, ayrı-seçkiliyə qarşı mübarizədə medianın artan rolundan bəhs edib. Bildirib ki, Azərbaycan tolerant ölkədir və respublikamızda mövcud olan bu mühitin təbliğində, bəzi xarici qüvvələrin dindən sui-istifadə cəhdlərinin qarşısının alınmasında kütləvi informasiya vasitələrinin rolu böyükdür. Milli mənəvi və dini dəyərlərimizin təbliğ və təşviq edilməsində, dinin ictimaiyyətə düzgün formada çatdırılmasında media təmsilçilərinin üzərinə böyük öhdəlik düşür. Jurnalistlər dinimizin təbliğini məhz bu istiqamətdə təşkil etməli, dini radikalizmlə mübarizədə daha fəal olmalı, ekstremizmə qarşı daha sərt mövqe tutmalıdırlar.

Prezident Administrasiyasının İctimai-siyasi məsələlər şöbəsinin əməkdaşı Bəhruz Həsənov dövlətimizin radikal dini cərəyanlara, terrorizmi dəstəkləyən qüvvələrə qarşı barışmaz mübarizə apardığını diqqətə çatdırıb. Qeyd edib ki, Azərbaycan dövlət müstəqilliyini bərpa etdikdən sonra dünyaya inteqrasiya yolunu tutub. Ölkəmizdə radikal dini cərəyanlara yer yoxdur.

Medianın üzərinə düşən vəzifələrdən danışan B.Həsənov deyib: “Media yalnız informasiya ötürücüsü olmamalı, analitik yazılarla çıxış etməli, hadisələrə münasibət bildirməlidir. Azərbaycan mediası tarixən əhalini maarifləndirmək yolunu tutub, dini xurafata qarşı kəskin mübarizə aparıb. Müəyyən məsələlərdə dövlət və medianın mövqeyi üst-üstə düşməyə bilər. Amma söhbət ümummilli məsələdən gedəndə ortaq mövqe nümayiş etdirilməsi vacibdir. İctimaiyyət Azərbaycan mediasından məhz bunu gözləyir”.

Mövzu ətrafında müzakirələrdə çıxış edənlər Azərbaycanda dövlət-din münasibətlərinin normal məcrada inkişaf etdiyi vurğulayıblar. Qeyd edilib ki, Azərbaycan çoxkonfessiyalı ölkədir və burada bütün dini konfessiyalara bərabər şərait yaradılıb. Jurnalistlər bu yönümlü yazıları hazırlayarkən dindən sui-istifadə və dini siyasiləşdirmək cəhdlərini, bunun törədə biləcəyi fəsadları və digər bu kimi amilləri daim diqqətdə saxlamalı, bu mövzuya son dərəcə həssaslıqla yanaşmalıdırlar.

Mədəniyyət.- 2016.- 26 avqust.- S.4.