Rejissor Rafiq Dadaşovun 70 illiyi qeyd olunub

Cəfər Cabbarlı adına “Azərbaycanfilm” kinostudiyasında rejissor Rafiq Dadaşovun 70 illiyi münasibətilə yubiley tədbiri keçirilib.

Tədbirdə R.Dadaşovun Azərbaycan kinosunun inkişafındakı xidmətlərindən danışılıb, lentə alınmasında iştirak etdiyi ekran əsərləri haqqında məlumat verilib.

Qeyd olunub ki, 1963-cü ildə əmək fəaliyyətinə başlayan Rafiq Dadaşov “Azərbaycanfilm” kinostudiyasında lentə alınan “Yenilməz batalyon”, “Sən nə üçün susursan?”, “Torpaq. Dəniz. Od. Səma”, “Bir cənub şəhərində” kimi bədii filmlərdə rejissor köməkçisi, “Səmt küləyi”, “1001-ci qastrol”, “Dantenin yubileyi”, “Yarımçıq qalmış serenada”, “Yol əhvalatı”, “Uzun ömrün akkordları”, “Qəm pəncərəsi”, “Ötən ilin son gecəsi” və s. bədii filmlərdə 2-ci rejissor qismində iştirak edib.

Rafiq Dadaşov 2016-cı ildə respublikanın Əməkdar mədəniyyət işçisi fəxri adına layiq görülüb.

Mədəniyyət.- 2016.- 31 avqust.- S.4.