Ölkəmiz İstanbulda idman və mədəniyyət festivalında təmsil olunub

Avqustun 26-dan 28-dək Türkiyənin İstanbul şəhərində Dünya Etnospor Federasiyasının (DEF) təşkilatçılığı ilə Etnik idman mədəniyyəti festivalı (Etnospor kültür festivalı) keçirilib.

Azərbaycanın İstanbuldakı baş konsulu Məsim Hacıyevin də iştirak etdiyi festivalın açılış mərasimində İstanbul valisi Vasip Şahin, İstanbul Böyükşəhər Bələdiyyəsinin sədri Kadir Topbaş və DEF-in rəhbəri Bilal Ərdoğan çıxış ediblər.

Diqqətə çatdırılıb ki, bu festivalın təşkilində məqsəd unudulan, geniş istifadə olunmayan qədim xalq idman oyunlarını xatırlatmaq, onlara yeni həyat vermək, xalqların qədim mədəniyyət nümunələrinin bir-birinə daha da yaxınlaşmasına töhfələr verməkdir. Qeyd olunub ki, bu festivalın hər il davamlı olaraq keçirilməsi nəzərdə tutulur.

Festivalın keçirildiyi yer çadır şəhərciyi, idman yarışları meydanı, rəsmi və bədii hissələr üçün nəzərdə tutulan bölmələrdən ibarət olub. Festivalda qədim “yağlı güləş” növləri (ayaq güləşi, “tozqoparan” və s.), oxatma üzrə yarışlar keçirilib, habelə aşıq yarışması təşkil edilib.

Festival çərçivəsində AZƏRTAC-ın Türkiyədəki bürosu tərəfindən Azərbaycan çadırı təşkil olunub. Çadırın qurulmasına Azərbaycanın İstanbuldakı baş konsulluğu və Türkiyədə fəaliyyət göstərən “Arazyayınçılıq” nəşriyyatı tərəfindən dəstək verilib. Günbəzində Azərbaycanın dövlət bayrağının dalğalandığı çadırda 20 Yanvar faciəsinə və Xocalı soyqırımına dair fotostendlər qurulub, o cümlədən “Arazyayınçılıq”ın Azərbaycana aid nəşrləri və baş konsulluğun ölkəmizə aid təbliğat vasitələri sərgilənib.

Mədəniyyət.- 2016.- 31 avqust.- S.5.