Mədəniyyətşünaslıq üzrə Elmi-Metodik Mərkəzin hesabat toplantısı keçirildi

“Qabaqcıl təcrübələri bütün müəssisələrə çatdırmaq, yenilikləri geniş şəkildə tətbiq etmək qarşıda duran əsas istiqamətlərdən olmalıdır”

Dekabrın 20-də Dövlət Gənc Tamaşaçılar Teatrında Mədəniyyət və Turizm Nazirliyi Mədəniyyətşünaslıq üzrə Elmi-Metodik Mərkəzin (MEMM) illik fəaliyyətinə həsr edilmiş hesabat toplantısı keçirildi. Tədbirdə mərkəzin əməkdaşları, regionlarda fəaliyyət göstərən mədəniyyət müəssisələrinin nümayəndələri və “Gənc mədəniyyət işçilərinin koordinasiya kreativ qrupu”nun üzvləri iştirak edirdi.

Əvvəlcə mərkəzin bu il ərzində fəaliyyətini əks etdirən video-çarx nümayiş olundu.

Elmi-Metodik Mərkəzin direktoru Asif Usubəliyev çıxış edərək görülən işlər barədə məlumat verdi. Bildirdi ki, mərkəzin strukturunda aparılan islahatlar Mədəniyyət və Turizm Nazirliyi sistemində həyata keçirilən islahatların tərkib hissəsidir. Qeyd olundu ki, görülən işlərin əsas məqsədi fəaliyyətin təkmilləşdirilməsi, müasir üsulların tətbiq edilməsi və mədəniyyət sahəsinin regionlarda populyarlaşdırılmasından ibarətdir.

Direktor bildirdi ki, il ərzində mərkəz tərəfindən ümumi iştirakçı sayı 28 min nəfərdən çox olan 100-ə yaxın metodiki təlim, elmi-praktik konfrans, seminar, həmçinin yubiley, əlamətdar gün və tarixlər, internet aksiyalar və s. tədbirlər keçirilib. Hesabat dövründə metodiki köməkliyin göstərilməsi məqsədilə mərkəzin 47 əməkdaşı 33 regiona ezam edilib. Təşkil edilən təlimlər ümumilikdə 43 rayonu əhatə edib. İl ərzində 32 adda müxtəlif məzmunlu yeni metodiki vəsait hazırlanıb. Mərkəzin işçi qrupu tərəfindən Azərbaycan mədəniyyəti ilə əlaqədar saxtalaşdırma, mənimsəmə və təhrif olunma faktlarına dair müxtəlif əcnəbi internet resurslarında monitorinq aparılıb, 246 fakt aşkar edilib.

Mərkəzin kütləvi informasiya vasitələri ilə sıx əməkdaşlıq etdiyini deyən Asif Usubəliyev qarşıda duran vəzifələrdən danışdı, mərkəzin yeni loqosunu təqdim etdi.

Tədbirdə çıxış edən mədəniyyət və turizm naziri Əbülfəs Qarayev Mədəniyyətşünaslıq üzrə Elmi-Metodiki Mərkəzin fəaliyyətini müsbət qiymətləndirdi. Mərkəzin mədəniyyət işçiləri arasında bu sahədə qəbul edilən qanunların təbliği və icra mexanizminin düzgün qurulması istiqamətində təşkil etdiyi treninq və kursların vacibliyini vurğuladı: “Metodiki tövsiyələrin hazırlanması ilə qabaqcıl təcrübələri bütün müəssisələrə çatdırmaq, yenilikləri geniş şəkildə tətbiq etmək qarşıda duran əsas istiqamətlərdən olmalıdır. Son bir ildə mərkəz çox lazımlı və məzmunlu tövsiyələr hazırlamışdır. Bizim rayon təşkilatlarımıza təqdim edilən bu tövsiyələr Bakıda tətbiq edilən təcrübənin yerlərdə daha da təkmil şəkildə həyata keçirilməsinə xidmət edir”.

Nazir bildirdi ki, Prezident İlham Əliyevin 2016-cı il 6 dekabr tarixli fərmanı ilə təsdiq edilmiş “Azərbaycan Respublikasında ixtisaslaşmış turizm sənayesinin inkişafına dair Strateji Yol Xəritəsi” ilə bağlı mədəniyyət və turizm sahəsində çalışan əməkdaşlar səylərini daha da gücləndirməli, bu fərmandan irəli gələn məsələlərin həllində turizm üzrə metodiki tövsiyələrdən istifadə edilməlidir.

Milli-mədəni dəyərlərin qorunması və təbliğinin vacibliyini vurğulayan Əbülfəs Qarayev bu istiqamətdə Heydər Əliyev Fondunun həyata keçirdiyi işləri yüksək qiymətləndirdi.

Elmi-Metodik Mərkəzin AMEA-nın müxtəlif institutları ilə əməkdaşlığını da təqdir edən nazir təcrübənin bölüşdürülməsinin əhəmiyyətini diqqətə çatdırdı, mərkəzə göstərilən köməyə görə elm adamlarına təşəkkürünü bildirdi.

“Gənc mədəniyyət işçilərinin koordinasiya kreativ qrupu”nun işinə uğurlar arzulayan Əbülfəs Qarayev qrupun gələcək fəaliyyətində beynəlxalq təcrübədən yararlanacağına əminliyini ifadə etdi.

Daha sonra Elmi-Metodik Mərkəzin direktor müavini Adilxan Bayramov nazirliyin “Fəxri mədəniyyət işçisi” döş nişanı və Bədii təhsil şöbəsinin əməkdaşı Zəbulla Quliyev fəxri fərmanla təltif olundu.

Toplantıda həmçinin Zaqatala, Şabran, Hacıqabul və Xızı rayon mədəniyyət və turizm şöbələri rəhbərlərinin hesabatları dinlənildi.

Lalə Azəri

Mədəniyyət.- 2016.- 21 dekabr.- S.2.