“Mən həmişə
öz Leylimi çəkirəm”
Əliyar Əlimirzəyev: “Rəssamlıq daha çox hissiyyatdan asılıdır”
Bu dəfə tanınmış
fırça ustası, Əməkdar rəssam Əliyar
Əlimirzəyevin emalatxanasında qonaq oldum. İllərdir sərgi salonlarında əsərlərini
izlədiyim rəssamın yaradıcılığını
başqalarından fərqləndirən çox
şeylər var. Onlardan
biri rəssamın tapdığı qeyri-adi formalardır. Başqa
bir özəllik isə xüsusi
olaraq seçdiyi rəngləridir.
Söhbətimizə sənətin dərin məsələlərindən başlayırıq. Mən deyirəm ki, istənilən rəssamın ən uğursuz əsərində belə onun nəsə demək istəyi, çabası var. O isə rəssamlığın daha çox hissiyyatdan asılı olduğunu söyləyir: “Rəssam bilir ki, burada ağ, orada isə qırmızı rəng olmalıdır. Ancaq niyə olmalıdır, onu deyə, izah edə bilmir. Ona görə ki, sənəti izah etmək olmur, daha doğrusu, çətindir”.
Düzdür, sənət sona kimi izah oluna
bilmir. Hər halda tamaşaçı
istər filmə baxsın, istər rəsm əsərinə
- gördüyünü, duyduğunu
özünə izah etməyə gərək duyur. Sənətin izah olunan hissəsi onun dərk edilən, anlaşılan hissəsidir.
İzah edilməyəni isə dərk olunmayan, yəni duyğuların öhdəsinə buraxılanıdır.
Müsahibimdən bu barədə
qənaətimi soruşuram.
Əliyar
Əlimirzəyev: “Salvador Dali bütün əsərlərində
danışır. Onun çəkdikləri
daha çox ədəbiyyata oxşayır.
Rəssam hər əsərində
nəyisə izah etməyə, anlatmağa çalışır. Bununla belə,
yenə də sirli qalır”.
Bu sözlərdən sonra o,
molbertin üzərindəki
bitirdiyi son əsərini
göstərib deyir: “Məsələn, burada qadın çəkmişəm,
ancaq qadın mənim üçün bir bəhanədir. Əsas olan orada rənglərlə
verməyə çalışdığım
hissiyyatdır. Qadın fiquruna
qədər bu kətanda 6 dəfə nələrsə çəkmişəm,
alınmayıb, pozmuşam.
Sonda bu qadın rəsmi
ortaya çıxıb.
Mən eləməmişəm, özü
çıxıb. Haradan çıxdığını
da bilmirəm”.
Sualım
yaranır: “Məgər
siz çəkəcəyiniz
əsəri öncədən
təsəvvürünüzdə, düşüncələrinizdə görmürsünüz?”
“Çəkəcəyim əsərdən yalnız
10 faiz nəsə görürəm, qalan 90 faiz yaradıcılıq prosesində ortaya çıxır. O da necə çıxır,
niyə çıxır
- bilmirəm. Bir onu deyə bilərəm ki, bu, belə
olmalıdır. Bu gün belə düşünürəm, belə
də çəkirəm.
Sabah bu fikrimin
üstündə dayanacağam,
ya yox, bilmirəm.
Ona görə ki, sabah
əsərlə bağlı
başqa ideyalar ortaya çıxacaq. Çəkdiyim əsərlə kimsəyə nəsə demək istəmirəm.
Mənim
üçün maraqlı
olan yalnız özümü ifadə etməkdir. Çəkdiklərim tamaşaçıların zövqünü oxşayırsa,
buna sevinirəm”.
Rəssam
“Kimsəyə nəsə
demək istəmirsinizsə,
demək, tamaşaçını
nəzərə almırsınız?”
sualıma belə cavab verir: “Əslində
mən iki nəfərəm: müəllif
və tamaşaçı.
Bu baxımdan əsərin ilk tamaşaçısı
da özüməm.
Başlıca məqsədim odur
ki, elə əsər yaradım ki, həmin əsəri məndən öncə kimsə yaratmamış olsun, başqalarını valeh etsin”.
Axır ki, söhbətin gedişində müsahibimin
yaradıcılığında incə məqamı tuta bilirəm. O, özünü
başqalarından fərqləndirən
bir özəlliyini dilə gətirir: “Mənimki forma axtarışıdır.
Forma başlıcadır, onu sonra məzmun
və rənglə hissiyyata tabe edirəm. Ancaq duyğusallıq formadan öndə olmalıdır. Forma məndə həm başlıcadır, həm
də yox. Yeni forma rəssam üçün
tapıntıdır. Əsas istəyim
özümü, varlığımı,
bütün hissiyyatımı
həmin formaya verə, orada göstərə bilməkdir”.
Bu düşüncələrini təsdiq
etmək üçün
Əliyar bəy bir xatirəsini danışır: “Münxendə
Van Qoqun “Günəbaxanlar”
əsərlərindən birinə
baxırdım. Əsəri uzun
müddət seyr etdim və ondakı
gözəlliyə vuruldum.
Sonra bunun səbəbini özümdən soruşdum.
Dedim ki, bu əsər V.Qoqun olmasaydı, belə sevərdimmi? Bəli, sevəcəkdim. Orada günəbaxanlar
rəssam üçün
bəhanədir. Başlıca olan V.Qoqun rəng
hissiyyatıdır. Əsərdə rəssamın bütün
ruhunu görə bildim”.
Ə.Əlimirzəyev uzun illərdir yaradıcılıqla məşğul
olur. Görəsən, yaradıcılıq onun üçün nədir? “Yaradıcılıq
mənim üçün
su içmək kimi bir tələbatdır.
Necə susayanda su içirlər,
mən də yaratmaq məqamı gələndə rəsm çəkirəm. Su susuzluğun
qarşısını aldığı
kimi, yaradıcılıq
da rəssamın iç dünyasını
sakitləşdirir”.
Rəssamın əsərlərində rəmzləşdirmə
və şərtiliklər
qabarıq gözə
dəyir. Onda realizm var, ancaq ifadə forması daha çağdaşdır. Di
gəl ki, əmin deyil ki, gələcəkdə
insanlar onun yaradıcılığını, nəzərdə tutduqlarını
olduğu kimi başa düşəcəklər.
Amma bunun qayğısını
çəkmir. O düşünür
ki, yaratdıqlarının
mənasını açmaq
elə də vacib deyil. Əsas
odur ki, əsər kimisə duyğulandırsın: “Tutaq
ki, muzeydə hansısa məşhur rəssamın çəkdiyi
bir əsərə baxırıq. Bizi əsərdə kimin portretinin olduğu yox, rəssamın onu hansı ustalıqla çəkdiyi düşündürür.
Tamaşaçını portreti çəkilmiş
insanın şəxsiyyətindən
daha çox, əsəri çəkənin
sənətkarlığı cəlb edir. Ona görə mənim əsərlərimdə bütün
formalar şərtidir,
ikinci dərəcəlidir.
Burada başlıca olan insanlara verə biləcəyim duyğusallıqdır”.
“Musiqiçi” əsərində
rəssam daha çox deformasiya olunmuş gerçəkliyi
təqdim edir və təsvir etdiyi hadisənin ola biləcəyinə
bizi inandırmaq istəyir. Burada ilk nəzərə çarpan isə cəsarətlə vurulmuş
rənglərin insanda
yaratdığı hissiyyatdır.
Bəs rəssam
özünü hansı
sənət cərəyanına
aid edir? Bu haqda “bilmirəm” sözündən
başqa heç nə demir. Əslində rəssamların çoxu belədir. Onlar üçün başlıca
olan yaradıcılıqdan
alınan mənəvi
həzdir, çəkdiklərinin
hansı cərəyana
aidliyini müəyyənləşdirməyi
isə sənətşünasların
öhdəsinə buraxırlar.
Yaratdığını izah edə bilməmək
bəlkə də bütün sənətkarların
ən zəif yeridir. Əliyar bəy də
çəkdiklərini izah
etməkdə çətinlik
çəkir. Məncə, sənətin sirri, bənzərsizliyi də elə bundadır. O,
öz durumunu belə anlatmağa çalışır: “Məcnundan
soruşurlar ki, o qara, arıq Leylidə nə görmüsən? Deyir ki,
ona mənim gözümlə baxmaq gərəkdir. Bu baxımdan əsərlərimin
hər biri mənim üçün Leylidir. Onları duymaq istəyən
mənim gözümlə
baxmağı bacarmalıdır.
Mən həmişə öz Leylimi çəkirəm”.
Əliyar bəy həm də heykəltəraşdır,
15-ə yaxın maraqlı
heykəli var. Baxmayaraq
ki, o heç vaxt özünü heykəltəraş saymır. Deyir ki,
rəsm çəkmək
həvəsi olmayanda heykəlləri yaradıb.
Heykəllərinin 5-i Müasir İncəsənət
Muzeyində saxlanılır.
Onu bəxtli
rəssamlardan saya bilərik. Ona görə ki,
bu çağa kimi yaratdığı əsərlərin demək
olar, hamısı satılıb. Emalatxanada 10-15 əsəri var. Uzun illər maddi çətinliyin içində
olub, indi əsərlərinin satışından
şikayəti yoxdur.
Rəssamın Serbiya və Gürcüstanda sərgiləri
keçirilib. Sonuncu ötən ilin
noyabrında baş tutub. 2005-ci ildə
isə 220 rəssamın
iştirakı ilə
Parisdə keçirilən
beynəlxalq sərgidə
birinci yer qazanıb. Sərgilərindən
biri Şərqi Timorda (Cənub-Şərqi
Asiyada ada-dövlət,
2002-ci ildə müstəqil
olub - red.) təşkil
olunub: “Bir dostum məni Şərqi Timora dəvət etmişdi, orada iki ay işlədim.
O vaxt orada vətəndaş müharibəsi
gedirdi. Ölkənin prezidenti sərginin
açılışına gəlmişdi. Bu, sərgi ölkənin tarixində ilk sərgi idi”.
S.Soltanlı
Mədəniyyət.- 2016.- 24
fevral.- S. 11.