“Rənglərin səyahəti”nin növbəti dayanacağı Budapeşt oldu

"Sönməz Məşəl" Mədəni Əlaqələr İctimai Birliyi neçə ildir ki, Azərbaycan mədəniyyətini, Qarabağ həqiqətlərini dünyaya tanıtmaq məqsədilə layihələr həyata keçirir. Xəbər verdiyimiz kimi, qurum iyunun 20-dən 26-dək Qeyri-Hökumət Təşkilatlarına Dövlət Dəstəyi Şurasının maliyyə yardımı ilə "Rənglərin səyahəti: Bakı-Budapeşt" adlı növbəti sərgini reallaşdırıb.

İyulun 1-də Azərbaycan Dillər Universitetinin “Amerika mərkəzi”ndə keçirilən təqdimatda bu barədə söhbət açıldı.

İctimai birliyin sədri, Azərbaycan Dillər Universitetinin professoru Şəhla Nağıyeva Azərbaycanın gənc xanım rəssamlarının Macarıstan paytaxtında keçirilən sərgisi barədə məlumat verdi. Bildirdi ki, sərgi Budapeşt ictimaiyyətini ölkəmizin mədəniyyəti, tarixi, təbiəti ilə tanış etmək, Dağlıq Qarabağ həqiqətlərindən söz açmaq, Ermənistanın işğalı nəticəsində baş verən faciələri bir daha diqqətə çatdırmaq məqsədi daşıyırdı. Şəhərdəki "Helia" hotelində açılan sərginin ziyarətçilərinə Heydər Əliyev Fondunun müxtəlif dillərdə nəşr etdirdiyi kitablar, Azərbaycan musiqisindən ibarət disklər də təqdim edilib.

"Rənglərin səyahəti: Bakı-Budapeşt" sərgisində Nərminə Vəliyeva, Şəhla Qəhrəmanlı və Günay Həsənovanın əsərləri nümayiş olunub.

Təqdimatda sərgi günlərində lentə alınmış videomaterial nümayiş etdirildi. Videomaterialda Azərbaycanın Macarıstandakı səfiri Vilayət Quliyevin, Türkiyənin həmin ölkədəki səfiri Şakir Fakılının, diplomatik korpusun digər nümayəndələrinin, Macar-Azərbaycan Dostluq Cəmiyyətinin sədri Svetlana Abdullayevanın sərgi barədə fikirləri yer alıb. Macarıstanda yaşayan və təhsil alan həmvətənlərimizin, eləcə də sənət adamlarının sərgilənən əsərlərin bədii dəyəri barədə söylədikləri fikirləri də eşitmək çox xoş idi. Bu ölkədə təhsil alan soydaşımız Əziz Əbilzadə isə sərginin açılış mərasimində gitara ilə çalıb-oxuduğu mahnıları “Amerika mərkəzi”nə toplaşanlar üçün də ifa etməsi ilə hər kəsə "Rənglərin səyahəti"nin təəssüratını yaşatdı.

G.Mirməmməd

Mədəniyyət .-2016.- 6 iyul.- S.12.