“Həyatımla yaradıcılığım bir-birini tamamlayır”

Aktyor sənətinin yazılmayan qanunları var, deyirlər. Onlardan biri də ifaçının hər hansı bir obrazının adı ilə tanınmasıdır. Böyük istedad sahibi olan aktyorlar isə təkcə bir obrazla sevilmir, müxtəlif rolların yaradıcısı kimi geniş tamaşaçı sevgisi qazanırlar. Xalq artisti Yasin Qarayev belə sənətkarlardandır. Bu il 70 illik yubileyini qeyd edən aktyor üçün ikiqat bayram oldu. O, may ayında Prezident təqaüdünə layiq görüldü.

Aktyorla söhbətimizdə ömür yoluna və yaradıcılığına nəzər saldıq. Sözlərindən bəlli olur ki, may ayı onun üçün həmişə düşərlidir. May ayında dünyaya gəlib, bütün fəxri adlara, təqaüdlərə də bu ayda layiq görülüb. Xalq artisti Prezidentin fərdi təqaüdünə layiq görüldüyünə görə dövlət başçısına təşəkkürünü bildirir.

Yasin Mikayıl oğlu Qarayev 1946-cı il mayın 22-də anadan olub. 1973-cü ildə Azərbaycan Dövlət İncəsənət İnstitutunun musiqili komediya fakültəsini bitirib. 1974-cü ildə Azərbaycan Dövlət Gənc Tamaşaçılar Teatrında yaradıcılıq fəaliyyətinə başlayıb. Teatrın səhnəsində Cəlal (S.Vurğun, "Komsomol poeması"), Qulu (S.S.Axundov, "Tamahkar"), Əsəd (C.Məmmədquluzadə, "Danabaş kəndinin məktəbi"), Şah (F.Məmmədov "Sirli dəyirman"), Aşıq, Mahmud (N.Vəzirov "Hacı Qəmbər"), Mir Cəfər Bağırov (Ə.Əmirli "Cəza"), Qafar (S.Rüstəm "Çimnaz xanım yuxudadır") və s. yaddaqalan obrazlar yaradıb.

Həmahənglik

Sənətkar keçmişi yada salır, ən çox gənclik dövrünü xatırlayır, incəsənətdə gənclik ən fəal dövrdür, deyir: “Həyatımla yaradıcılığım bir-birini tamamlayır. Ömrümü sənətdə keçirmişəm. Həyatımın maraqlı, unudulmaz anları bu sənətlə bağlıdır. Teatrda əziyyətli anlar, xoşbəxt, sevincli anlar da az olmayıb. Arxaya boylananda o dövrün sənət adamlarını xatırlayıram. Bugünlə müqayisədə o insanların, həqiqətən, sənətə əziyyətlə gəldiklərini, səhnədə fədai olduqlarını düşünürəm”.

Yasin müəllim son illər teatrlarda yaradılan şəraitin, bu sahəyə dövlət qayğısının sənətə müsbət təsirindən danışır: “Bu gün Gənc Tamaşaçılar Teatrının səhnəsində 248 projektor işləyir. Vaxtilə 6 projektorla tamaşalar göstərirdik. Bu texniki inkişaf həm aktyor oyununa, həm də rejissor yozumuna həddən artıq kömək edir”.

Ömrünün 42 ilini Gənc Tamaşaçılar Teatrında çalışan aktyor kollektivin son illər tez-tez beynəlxalq festivallara qatıldığını, əcnəbi rejissorların tamaşa hazırladıqlarını, beynəlxalq layihələrdə iştirak etdiyini bildirir: “Bütün bunlar bizi sevindirir. Amma sırf sənət nöqteyi-nəzərindən onu da qeyd etməliyəm ki, səhnəmizdə korifey sənətkarların yeri görünür. Onların yoxluğu səhnədə boşluq yaradıb”.

“Hər dəfə səhnəyə çıxanda pərdənin arxasında dua edirəm”

Sənət insana nə verir sualımızı cavablandıran aktyor deyir: “Tamaşaçı sevgisi, tanınmaq və s. Əgər bu gün sənətim dövlət tərəfindən də qiymətləndirilirsə, bu, elə sizin sualınıza cavabdır. Bundan əlavə, mənəvi dünyamız zənginləşir. Aktyorlar uşaq təbiətli, kövrək olurlar. Biz müşahidəni çox sevirik. Ona görə də sənətin verdiyi xüsusiyyətlərdən biri də başqasının görə bilmədiyini görməyimizdir. Bu, çox çətindir. Sənət bizə həm də anlamaq dərdi verir və biz hər xırdalığı ürəyimizə salırıq. Aktyorlar qeyri-adi insanlardır. O, səhnədə yaşayır, öz rolunun, obrazının xarakterini axtarıb tapır”.

Yasin müəllim tərəf-müqabillərini belə xarakterizə edir: “Mənim elə tərəf-müqabillərim olub ki, ilk baxışdan bir-birimizi başa düşmüşük. Bu gün Ağaxan Salmanlı, Tariyel Qasımovla səhnədə rahat oynayıram. Rəhmətlik Azər Mirzəyev və Gülşən Qurbanova ilə çıxışlarımız isə hamıya bəllidir. Onu da deyim ki, bu illər ərzində hər dəfə səhnəyə çıxanda pərdənin arxasında dua edirəm və bu dualar hər zaman mənə kömək olur. Bu da bir həqiqətdir ki, obraz hər zaman uğurlu ola bilməz. Aktyorluq Allah vergisi olsa da, zəhmətkeş olmalısan. İnsan zəhmətin nəticəsində kamilləşir, püxtələşir. Bu gün gənc nəsildə bir parıltı hiss olunur. İnanıram ki, onlar gələcəkdə parlayacaqlar”.

“Özüm kinodan yan keçdim...”

“İncəsənət gözəldir, kino isə bu sahənin ən gözəlidir. Bu gözəli o qədər sevmişəm ki, amma o mənə qarşı çox insafsız olub. Bəlkə də vaxtilə teletamaşalara çox çəkildiyimdən kinodan ayrı düşdüm”, - həmsöhbətim deyir.

Yasin müəllim “Gəzdim Azərbaycanı” televiziya layihəsi ilə bütün ölkədə tanınıb: “Bəlkə də elə özüm kinodan yan keçdim. Amma buna baxmayaraq, adda-budda olsa da, o mənə nəzər yetirdi. İki il bundan əvvəl rəhmətlik Fikrət Əliyevin “Axırıncı dayanacaq” filminə çəkildim. Film çox təsirli idi. Ekran əsərində yaşlı nəsil aktyorlarımız çəkilirdi. Bu filmdən unudulmaz xatirələr qaldı”.

Sənətkar yubileyi ilə əlaqədar Gənc Tamaşaçılar Teatrı tərəfindən tədbir keçiriləcəyini dedi. Yasin müəllim söhbətimizin sonunda zəruri bir çağırış da etdi: “Mən tamaşaçıları çox sevirəm. Onları teatra dəvət edirəm. Aktyoru yaşadan tamaşaçı sevgisidir. Onlar gəlib bizi, biz aktyorlar da onları sevindirək”.

Biz də Yasin müəllimi 70 illik yubileyi münasibətilə təbrik edir, cansağlığı və yaradıcılıq uğurları arzulayırıq.

Lalə Azəri

Mədəniyyət.- 2016.- 15 iyun.- S.11.