“Formula 1” şəhərciyində əyləncə və adrenalin

Dənizkənarı Milli Parkdakı “Formula 1” şəhərciyi qonaqları qəbul etməyə başlayıb. Yerli və xarici qonaqların vaxtının maraqlı keçməsi üçün burada bütün işlər “Bakı Şəhər Halqası” Əməliyyat Şirkəti tərəfindən yüksək peşəkarlıqla görülüb.

Qədim və zəngin tarixə, mədəniyyətə sahib olan Azərbaycan həmişə qonaqpərvərliyi ilə seçilib. Şəhərcikdə ölkəmizin mədəniyyətini və mətbəxini təmsil edən xüsusi bölmələr xalqımızın qədim ənənələrini qonaqlara təqdim edir. Yüksək keyfiyyəti və naxışlarının zənginliyi ilə seçilən Azərbaycan xalçaları bu məkanda qonaqların diqqətini cəlb edir. Milli şirniyyat növləri olan paxlava, şəkərbura və qoğalın ləziz dadı turistlərin zövqünü oxşayır. Rəngarəng naxışlı əl işləri və ipək kəlağayılar da ziyarətçilərin böyük marağına səbəb olur.

İyunun 17-də axşam saatlarında Kris Braun özünün yüksək enerjili məşhur şousu ilə möhtəşəm musiqi və idman həftəsonuna rəng qataraq əyləncə proqramına start verəcək. Şənbə günü axşam dünyanın ən məşhur canlı musiqi ifaçısı adını qazanmış Enrike İqlesias həyəcan dolu konsert proqramı ilə səhnədə yer alacaq. İyunun 19-da axşam isə yarış başa çatarkən dünyanın ən tanınmış ulduzlarından Farel Vilyams əsas səhnədə yer alaraq möhtəşəm musiqi proqramı ilə Avropa Qran-prisinə yekun vuracaq.

Yarış günləri ərzində səyyar məzhəkəçi aktyorlar tamaşaçıların istirahətinə xüsusi rəng qatacaqlar. Səyyar proqrama “Güzgü adam”, aktyor Spandi Andi, “Ağacayaq”, “Küçə rəssamları”, “Titan robot” və ənənəvi Azərbaycan rəqsləri daxildir.

Mədəniyyət.- 2016.- 17 iyun.- S.2.