Tələbələrin Novruz sərgisi

Azərbaycan Rəssamlar İttifaqında Azərbaycan Dövlət Mədəniyyət və İncəsənət Universitetinin rəssamlıq fakültəsi tələbələrinin sərgisi açılıb. Sərgidə universitetin müxtəlif kurslarda təhsil alan 50-dən çox bakalavr və magistrinin 150-dək işi nümayiş olunub.

Açılış mərasimində Azərbaycan Rəssamlar İttifaqının katibi, ADMİU-nun professoru, Xalq rəssamı Ağəli İbrahimov, universitetin rektoru, professor Fərəh Əliyeva, xalq rəssamları Arif Əziz, Xanlar Əhmədov çıxış edərək layihənin istedadlı gənclərin əl işlərinin sənətsevərlərə, geniş kütləyə təqdim olunması baxımından əhəmiyyətindən danışıblar, tələbələri təbrik edərək gələcəkdə belə sərgilərin mütəmadi olaraq təşkil olunmasını arzulayıblar.

Sonra qonaqlar universitetin tələbələrinin ifasında səslənən musiqi sədaları altında nümayiş olunan əsərlərlə yaxından tanış olublar. Sərgidə işi ilə fərqlənən bir neçə tələbə diplomla təltif edilib.

Ekspozisiyada müxtəlif janrlarda yağlı boya ilə işlənmiş tablolar, qrafik işlər, kağız üzərində şəbəkə üslubu ilə kəsilmiş maketlər və başqa işlər yer alıb. Dekorativ-tətbiqi sənət və dizayn kafedrasının müəllimi Nəzakət Əhmədova tərəfindən təşkil edilən tələbələrinin sərgisi ilk dəfədir ki, Rəssamlar İttifaqında keçirilir.

Mədəniyyət.- 2016.- 30 mart.- S. 5.