"İsinsin azacıq bu daş duyğular”

Aprelin 28-də Azərbaycan Rəssamlar İttifaqının (ARİ) Vəcihə Səmədova adına sərgi salonunda rəssam Kirman Abdinin Xalq şairi Məmməd Arazın poeziyasına həsr etdiyi "İsinsin azacıq bu daş duyğular” adlı fərdi qrafika sərgisinin açılışı keçirildi.

Tədbiri ARİ-nin katibi, Xalq rəssamı Ağəli İbrahimov açaraq Kirman Abdinin yaradıcılığı haqqında iştirakçılara məlumat verdi. O, rəssamın sənətsevərlərə təqdim olunan əsərlərinin Məmməd Arazın poeziyasına vurğunluqdan yarandığını bildirdi. Qeyd etdi ki, bu sərgi rəssamın son üçillik zəhmətinin bəhrəsidir.

Xalq rəssamı, ARİ-nin qrafika bölməsinin rəhbəri Arif Hüseynov həmkarının M.Araz poeziyasına üz tutmasını yüksək dəyərləndirdi, sərginin ədəbiyyatla rəssamlığın uğurlu qovuşmasından ərsəyə gəldiyini söylədi. M.Arazın yaradıcılığını təsviri sənət baxımından daha çox “ağ-qara” rənglər şairi olaraq səciyyələndirən rəssam bu əsərlərin gələcəkdə ədibin kitablarında da görmək istədiyini dedi.

Əməkdar incəsənət xadimi, sənətşünas Ziyadxan Əliyev M.Araz poeziyasının bədii ifadəsi baxımından sərgini uğurlu saydı, rəssamların bədii ədəbiyyata ardıcıl müraciət etməsinin vacibliyini bildirdi.

ARİ-nin “İncəsənət” jurnalının baş redaktoru, şair Musa Ələkbərli sərginin M.Araz poeziyasına layiqli töhfə olduğunu vurğuladı, böyük söz ustadına ithaf etdiyi şeiri oxudu.

Şair Ramiq Muxtar söz ustadı ilə rəssamın düşüncə birliyindən yaranan əsərləri yüksək dəyərləndirdi.

Yazıçı-publisist, Milli Məclisin deputatı Aqil Abbas şairin ailəsi adından rəssama, sərgiyə gələnlərə sayğısını ifadə etdi: “Çox sevinirəm ki, Məmməd Arazın yaradıcılığına rəssamlar da müraciət edirlər. Həqiqətən, şairin poeziyasının çəkisi, fəlsəfəsi onu rəsm əsərinə çevirməyə imkan verir”.

Sonda müəllif çıxış edərək sənətsevərlərə ürək sözlərini yetirdi: "Bu əsərlərdə böyük şairin yaradıcılığına üç yöndən yanaşmağa çalışmışam: həyata gülən, qəm çəkən və düşünən Məmməd Araz. Onun poeziyasına müraciət etmək məndən məsuliyyət tələb edirdi. Sevinirəm ki, üçillik zəhmətim bu gün bəhrəsini verdi”.

Sonra iştirakçılar sərgi ilə tanış oldular. Sərgidə K.Abdinin 60 əsəri nümayiş olunur. Rəssam əsasən M.Arazın fəlsəfi yüklü, şah misralarına qrafik əsərlər çəkib, şair dünyasının rəssamlıqda uğurlu bədii həllinə nail olub. Əsərlərin içərisində şairin bir neçə qrafik portretləri də ayrıca diqqət çəkir.

Qeyd edək ki, Kirman Abdin 1959-cu ildə Şahbuz rayonunda anadan olub. Ə.Əzimzadə adına Dövlət Rəssamlıq Məktəbini, Azərbaycan Dövlət Mədəniyyət və İncəsənət Universitetini bitirib. Ölkəmizdə və xaricdə keçirilən sərgilərin iştirakçısı və mükafatçısıdır. 1989-cu ildən Azərbaycan Rəssamlar İttifaqının üzvüdür. Uzun illərdir mətbuatda rəssam kimi fəaliyyət göstərir.

Soltan

Mədəniyyət.- 2016.- 4 may.- S. 10.