Xalq rəssamı Maral Rəhmanzadənin 100 illiyi münasibətilə sərgi açılıb

Noyabrın 15-də Azərbaycan Milli İncəsənət Muzeyində Xalq rəssamı Maral Rəhmanzadənin (1916-2008) anadan olmasının 100 illiyi münasibətilə xatirə sərgisinin açılışı oldu.

Tədbiri giriş sözüylə Mədəniyyət və Turizm Nazirliyinin Təsviri və dekorativ sənət sektorunun müdiri Qalib Qasımov açaraq sərgi haqda qısa bilgi verdi.

Mədəniyyət və turizm nazirinin müavini Ədalət Vəliyev çıxışında məşhur rəssam, rəngkar və qrafik Maral Rəhmanzadənin incəsənət tariximizdə tutduğu yerdən bəhs etdi. Bildirdi ki, rəssam xalqımızın çoxəsrlik mədəniyyətində özünə əbədilik qazanmış şəxsiyyətlərdəndir. Nazir müavini sağlığında Maral xanımla bir neçə dəfə görüşdüyünü, həmin görüşlərin onun yaddaşında gözəl xatirələrlə qaldığını vurğuladı.

Qeyd etdi ki, rəssamın yaradıcılığında Azərbaycan təbiəti, məişəti, doğma yurdun bütün gözəllikləri böyük ustalıq və bədiiliklə, sevgiylə tərənnüm olunub. Bunun nəticəsidir ki, ilk qadın rəssamlarımızdan olan M.Rəhmanzadə yaradıcılığı ilə özündən sonra xalqı üçün böyük mənəvi sərvət qoyub gedib.

Azərbaycan Rəssamlıq Akademiyasının rektoru, akademik Ömər Eldarov görkəmli fırça ustası ilə səmimi, doğma münasibətindən, onun zəngin yaradıcılığından, öz sənətinə olan vurğunluğundan danışdı. Vurğuladı ki, Maral Rəhmanzadənin əsərlərində doğma yurda bağlılıq, əsrarəngiz təbiətinə dərindən vurğunluq onun əsərlərini hər zaman tamaşaçı üçün əbədiyaşar edir.

Rəssamlar İttifaqının katibi, Xalq rəssamı Ağəli İbrahimov da Maral xanımın rəssamlıq tarixindəki uca mövqeyindən söz açdı. Bildirdi ki, M.Rəhmanzadəni Azərbaycanın ən ucqar kəndlərində belə yaxşı tanıyırdılar. Rəssam ömrünün sonuna qədər yaradıcılığına sadiq qalıb, fırça və kətandan ayrılmayıb. O, Neft daşlarından əsərlər çəkən ilk rəssam olub.

Rəssamın ailəsi adından danışan professor Ceyran Mahmudova sərginin təşkilinə görə əməyi keçən hər kəsə, tədbirə gələn bütün sənətsevərlərə minnətdarlığını bildirdi.

Sonra sərginin açılışını bildirən lent kəsildi, tamaşaçılar əsərlərlə yaxından tanış oldular. Sərgidə rəssamın realizm üslubunda işlədiyi ailəsinin kolleksiyasında, Azərbaycan Dövlət Rəsm Qalereyası və Azərbaycan Milli İncəsənət Muzeyinin fondunda saxlanılan rəngkarlıq və qrafika əsərləri nümayiş olunur. Rəssamın “Dağ mənzərəsi”, “Göygöl”, “Dağ qızları”, “Naxçıvan gözəlləri”, “Qızlar bulağı”, “Avtoportret”, “İçərişəhər”, “Ordubad dağları”, “Xınalıq kəndi”, “Dağlar”, “Tarla sahibələri”, “Çayçı qızlar”, “Günəşin şirəsi” kimi 80-dən çox əsəri sənətsevərlərin ixtiyarına verilib.

Bildirək ki, Maral Rəhmanzadə 1916-cı il iyulun 23-də Bakıda anadan olub. 1930-1933-cü illərdə Azərbaycan Dövlət Rəssamlıq Texnikumunda oxuyub, 1940-cı ildə V.İ.Surikov adına Moskva Dövlət Rəssamlıq İnstitutunu bitirib. Təhsildən sonra doğma vətənə qayıdaraq ömrünün sonunadək yaradıcılıqla məşğul olub. M.Rəhmanzadənin geniş yaradıcılığı hər zaman sənətsevərlərin diqqət mərkəzində olub və yüksək qiymətləndirilib. O, milli təsviri sənətimizin inkişafındakı böyük xidmətlərinə görə "Şöhrət" ordeninə layiq görülüb. Rəssam 2008-ci ildə vəfat edib.

Sərgi noyabrın 19-da başa çatacaq.

S.Qaliboğlu

Mədəniyyət.- 2016.- 16 noyabr.- S.4.