Şərqin ilk qadın dirijorunun yubiley gecəsi

Dilbər Əbdürrəhmanova Azərbaycan bəstəkarlarının da sənət dostudur

Daşkənddə SSRİ Xalq artisti, Əlişir Nəvai adına Daşkənd Dövlət Opera və Balet Teatrının dirijoru, Azərbaycanın yaxın dostu, professor Dilbər Əbdürrəhmanovanın 80 illik yubileyi təntənəli şəkildə qeyd edilib.

Gecədə çıxış edən Özbəkistan mədəniyyət və idman işləri nazirinin müavini Fərhad Curayev yubilyarın həyat və yaradıcılığı haqqında məlumat verib, onu əfsanəvi dirijor adlandırıb. Qeyd edib ki, Dilbər Əbdürrəhmanova keçmiş SSRİ məkanında, ümumiyyətlə, Şərqdə ilk qadın dirijordur.

Özbəkistan Bəstəkarlar İttifaqının sədri Rüstəm Abdullayev, pedaqogika üzrə elmlər doktoru, professor, soydaşımız Almaz Məcidova və başqaları D.Əbdürrəhmanovanın dirijorluq etdiyi əsərlər haqqında məlumat veriblər.

Sonra yubilyarın dirijoru olduğu səhnə əsərlərindən parçalar göstərilib, Daşkənddəki digər teatrların kollektivləri yubilyarı təbrik ediblər.

Azərbaycanın və Özbəkistanın Xalq artisti, Daşkənd Dövlət Opera və Balet Teatrının baş rejissoru Firudin Səfərov deyib ki, onun bu teatrda tamaşaya qoyduğu 70-dən artıq klassik və müasir operanın dirijoru məhz Dilbər Əbdürrəhmanovadır. O, həmçinin böyük bəstəkarımız Arif Məlikovun bu teatrda uzun illərdən bəri səhnədən düşməyən “Məhəbbət əfsanəsi”, Fikrət Əmirovun “Min bir gecə” baletlərinin də dirijorudur.

Mədəniyyət.- 2016.- 7 oktyabr.- S.15.